DILI, STLTIMORLESTE.com – Graduadus neebe remata ona estudu iha universidade labele hein buka servisu, maibe kria rasik servisu ba ninia aan.
Liafuan nee hatoo husi Felipe da Silva nuudar Dosente husi Universidade Dili (UNDIL) ba STL, Kuarta (15/01/2025).
“Ita hatene katak, TL nee hasoru problema ba kampu servisu, numeru dezempregu neebe kada tinan sae, ida nee hanesan problema nasional neebe ita tenke buka solusaun, nee ita haree ba aspeitu rua neebe importante, ida iha parte governu, oinsa loke oportunidade servisu liu husi investimentu setor privadu, hodi nunee bele loke kampu servisu ba ita nian joven sira hodi redus numeru dezempregu,” dehan nia.
Nia hatete, fila fali ba graduadus ninia aan rasik, durante tinan lima nia laran iha universidade, iha ona kapasitasaun ho siensia neebe sira hetan, oinsa mak sira rasik atu kria servisu ba aan rasik iha area agrikultura, komersiu no seluk tan.
Nia hatutan, lalika hanoin hein buka servisu, maibe oinsa nain rasik buka dalan kria kampu servisu, karik mos ho rendimentu neebe kiik, ida nee mak importante.
Iha fatin seluk, Diretor Ezekutivu TLCE, Jose Monteiro dehan, los duni too agora graduadus barak mak seidauk hetan servisu no balu ba servisu iha rai liur, tanba iha rai laran nee menus kampu servisu, tanba ho kampu servisu neebe mak menus, halo graduadus barak sai ba servisu iha rai liur.
(jac)