DILI, STLTIMORLESTE.com – ONG Hali Ba Dame (HABADA) Kongratula ba Polísia Nasional Timor Leste (PNTL) liu Diresaun Servisu Investigasaun Kriminal (DSIK), Polisia Sientífiku Investigasaun Kriminal (PSIK) desmantela jogus Online Scam Call Center iha Timor Leste (TL).
Diretor Ezekutivu HABADA, Abel Amaral hatete, jogus online sentru fraude sanulu resin-rua desmantela iha semana tolu nia laran, tanba nee HABADA alerta TL hasoru ameasa krime organizadu neebe seriu, maibe kongratula no apresia ba PNTL nomos segurasaun sira seluk neebe konsege desmantela jogus online Scam Call Center iha TL.
“HABADA kongratula no apresia ba PNTL no servisu imigrasaun, PSIK, Servisu Informasaun Polisia nomos F-FDTL neebe rapidamente desmantela fatin sira neebe mak ita deskonfia halao atividade Ilísitu sira,” hatete Diretor Ezekutivu HABADA, Abel Amaral ba jornalista sira liu husi konferensia imprensia iha salaun HABADA, Comoro, Tersa (21/07/2026).
Nia tenik, HABADA mos hatoo apresiasaun ba lider komunitariu sira hotu iha munisipiu no Dili, liu-liu ba komunidade sira neebe mak servisu hamutuk ho PNTL.
“Ita mos hakarak hatoo apresiasaun ba estadu ba luta kontra krime transnasional iha TL, tantu direita o indireita,” nia esplika.
Nia relata mos relatoriu konaba Jogu Online Scam Call Centre iha TL, ONG HABADA ohin fo sai relatóriu monitorizasaun seguransa konaba operasun jogus Online Scam Call Center sira iha TL neebe PNTL no Policia PSIK desmantela ona operasaun sentru fraude sanulu resin rua Dili no Liquiça, hahu 26 Junhu no 19 Julhu 2026.
“Husi operasaun nee ita akompanha iha suspeitu 409 hetan detensaun no identifika iha deit loron semana tolu nia laran. Ida nee laos husi insidente izoladu sira, ida nee propagasaun husi fatin sira, no eskala husi operasaun ida-idak, husi ema nain 2 too 99 hatudu rede ida ho estrutura, finansiamentu no lojistika neebe metin iha atividade sira nee iha kotuk,” nia informa.
Nia deklara, husi fatin sanulu resin ida envolve suspeitu sira ho nasionalidade xineza, no sidadaun Indonezia sira maioria iha kazu rua Liquiça nian. Polisia sira hetan infraestrutura neebe hanesan, neebe asosiadu ho operasaun fraude nian iha fatin seluk iha rejiaun Sudeste Aziatiku nian, hanesan aluga rezidensia sira, armajen, otel.
“Ita haree iha fatin ida iha Metiaut Dili kama 43 neebe instala iha uma andar rua nia laran, neebe hatudu katak fatin nee funsiona hanesan dormitóriu ba trabalhador sira. Iha Bebonuk deit polísia prende komputador 88 no laptop 13, ida nee nuudar prova husi operasaun ida neebe presiza investimentu ho kapital boot,” nia koalia.
Diretor HABADA hatutan, infraestrutura fiziku neebe identifika iha TL rezidénsia alugadu, armazen, otel no kama ho estilu dormitkriu ba okupante sanulu resin koresponde ho tipolojia kompleksu neebe dokumenta husi OHCHR iha Kamboja, Myanmar no Laos. Ida nee reforsa HABADA nia preokupasaun katak, detidu balun potensia sai hanesan vitima trafiku umanu, envezde elementu neebe envolve. Tanba nee presiza investigasaun ida neebe klean hodi identifika kestaun ida nee.
(jen)
