DILI, STLTIMORLESTE.com – Planu Governu nian atu hamate eletrisidade iha tuku 23:00 too 05:00 dader hamosu reasaun makaas husi parte oin-oin iha sosiedade. Lider Politiku, Sosiedade Sivil no Komunidade sira preokupa katak medida nee bele fo impaktu negativu ba hamoris krime ka seguransa publiku, saude no ekonomia familia nian.
Visi Prezidente Partidu Libertasaun Popular (PLP), ba Asentu Orgaun Asosiadu no Movimentu, Amilcar dos Reis Araujo “ Hatenu” hatete, maski sira komprende krizi kombustivel global, maibe Governu tenke iha planu mitigasaun ka hamate ahi neebe klaru antes foti desizaun sira neebe todan ba povu.
“Se bairu sira nakukun iha kalan boot, nee fo biban boot ba krime no konfuzaun iha komunidade laran, polisia nia servisu mos sei sai todan liu tan tanba labele monitoriza situasaun ho diak iha fatin neebe laiha naroman,” dehan Amilcar ba STL iha nia rezidensia Manleuana, Dili, Tersa (07/04/2026).
Aleinde seguransa, negosiante kiik sira mos sente preokupadu. Nelia Soares nain ba kios iha Manleuana kestiona oinsa ho sira nia sasan neebe presiza konzelador ka freezer. “Ita rai naan no ikan iha freezer ka konzelador laran ahi mate kalan too dader, sasan sira nee bele sai dois no ami lakon osan. Governu tenke hanoin mos ba ami povu kiik sira nia moris,” dehan Nelia.
Nunee mos Observador Ekonomia, Pedro da Silva husu Governu tenke prioriza fali poupa iha edefisiu publiku sira neebe baibain lakan durante kalan tomak, duke hamate ahi ba komunidade baibain.
Entretantu planu hatoo uluk husi Primeiru Ministru ( PM), Kay Rala Xanana Gusmão hanesan medidade antisipasaun ba funu iha Medio Oriente hamenus gazoel ba sentral eletrika ba Hera no Betano. Maski Governu foin sosa gazoel foun, maibe sakrefisu husi povu sei sai hanesan opsaun se situasaun mundu nian la diak.
(car)
