DILI, STLTIMORLESTE.com – Tribunal Judisial Primera Instansia Dili halao julgamentu ba arguidu ho inisial SS, neebe komete krimi hasoru lezadu ho inisial FS.
Tribunal haree katak, krimi refere lei fo dalan atu bele dada fila, kuandu lezadu neebe hanesan vitima ba iha prosesu nee aseita.
Tribunal esplika tiha, lezadu neebe hanesan vitima ba iha prosesu nee deklara katak, hakarak dada fila krimi nee tanba razaun lezadu hanesan estudante, no segundu besik loron boot ona lezadu hakarak perdua arguidu.
Maibe lezadu mos deklara, husu arguidu atu labele halo tan aktu hanesan nee iha futuru.
Iha sala julgamentu laran, arguidu mos hamriik husu deskulpa ba lezadu, promete sei la halo tan aktu nee iha futuru.
Rona tiha ida nee, Prokurador no Defensor husu ba Tribunal atu homologa prosesu nee, ikus mai Tribunal desidi homologa prosesu nee no absolve arguidu husi instansia.
Tribunal mos fo hanoin ba arguidu atu ba futuru labele halo tan aktu nee, tanba lei bandu.
Tuir akuzasaun neebe iha katak, iha loron la apuradu maibe iha tinan 2021, momentu neeba lezadu atu ba eskola.
No lezadu eskola iha Krsital, tanba nee lezadu konduz karreta tula ho nia alin feto rua liu husi diresaun SMA 4 nian, too iha fatin neeba udan no arguidu hamutuk ho nia kolega sira haris hela udan iha estrada ninin.
Lezadu konduz karreta liu no bee iha estrada laran haksoit hodi kona-ba iha arguidu, maibe lezadu la haree ida, tanba nee lezadu kontinua konduz karreta ba iha eskola Kristal nian.
Momentu neeba arguidu konduz motor ida tuir lezadu ba, hodi too iha neeba arguidu diretamente basa lezadu dala rua, no tuku lezadu dala ida, no tuku vidru oin karreta nian.
Tanba nee, Minsteriu Publiku akuza arguidu komete krime Danu Simples no Ofensa Simples neebe previstu iha artogu 145 husi Kodigu Penal.
Audensia julgamentu nee prezide husi Juiz Ana Paula, Ministeriu Publiku reprezenta husi Prokurador Pedro Baptista, arguidu hetan asistensia legal husi Defensor Publiku Sergio Dias Quintas.
(ter)
