Hans Klemm Husu ME Apoiu Fasilidade

Meza no kadeira eskola (Foto: Espesial)

DILI, STLTIMORLESTE.com – Ensinu Baziku Filial (EBF) Hans Klemm Bairo Pite husu apoiu fasilidade eskola hanesan meza no kadeira 250 ba Ministeriu Edukasaun (ME), hodi fasilita estudantes sira iha ensinu aprendizajen.

Koordenador Ensinu Baziku Filial (EBF) Hans Klemm Bairo Pite, Lucas Brandão da Silva hatoo kestaun nee ba STL iha nia knaar fatin Bairo Pite, Kuarta (15/01/2025).

“Ami iha nee sala aprendizajen sia (9), nee duni ami presiza tan meza no kadeira hamutuk 250, atu nunee kada klase ida 50, nunee mos kondisaun ida profesor sira tur, tanba iha nee profesores feto mak barak, mane rua tolu deit, tanba profesor sira lori kedas kadeira husi kantor mak ba tur iha sala aprendizajen,” nia afirma.

Nia akresenta, husu ba governu liu husi ME atu bele kria kondisaun fatin ba profesor sira inklui fasilidade meza no kadeira neebe ohin mensiona, tanba tinan nee numeru estudantes barak mak tama iha eskola ida nee, maske ninia total numeru hira seidauk hatene, tanba too agora sei kontinua simu estudantes foun.

Iha parte seluk, Diretor Diresaun Nasional Infraestrutura no Edukativu iha ME, Helio Lopes hatete, kadeira no meza sufisiente ona para atu responde eskola sira neebe laiha kadeira no meza inklui sala de aulas foun sira neebe konstrui, laiha kadeira no meza, presiza atu prienxe ba sala de aulas foun sira neebe konstrui, kadeira ho meza eskola barak eziste hela, falta de jestaun para kontrolu sasan sira nee.

“2025 Ministeriu sei la aloka orsamentu ba halo akizasaun ba iha kadeira ho meza, tanba agora daudaun mos kadeira ho meza ita iha hela no balu sei mai tan iha dalan, Ministeriu halo tiha ona prosesu aprovizionamentu ba kompras akizasaun kadeira no meza, hahu husi pre eskolar too iha nível sekundariu. Hau hanoin iha Setembru nia laran, kadeira ho meza too mai, Outobru hanesan nee Ministeriu sei halo distribuisaun,” tenik nia.

(jac)

Share it :

Leave a Reply

Your email address will not be published. Required fields are marked *