DILI, STLTIMORLESTE.com – Jurista konsidera katak tempu too ona harii sentru juvenil, hodi koloka minoridade sira neebe halo krime ba iha fatin nee.
Jurista Sergio Dias Quintas hatete, minoridade neebe pratika krime ruma labele husik deit sira livre, maibe tanba estadu Timor Leste ratifika ona konvensaun internasional kona-ba direitu labarik, ho razaun sira nee mak direitu labarik sira nee tenki protejidu.
“Wainhira sira involve iha krime sira labele kastigu hamutuk ho ema boot sira iha prizaun, maibe tenki iha fatin propriu ba sira para bele eduka sira molok reintegra ba familia no sosiedade. Estadu tenki harii sentru juvenil ba minoridade sira wainhira sira iha problema ho krime, bele koloka sira iha sentru juvenil, nunee sira bele goja sira nia direitu infantil,” dehan Sergio.
Nia hatutan, goja direitu infantil, signifika katak sentru juvenil sai fatin ida neebe labarik sira bele asesu ba edukasaun formal no informal hanesan sira seluk iha liur, hodi nunee mak bele kapasita labarik sira nia abilidade no karakteristiku.
Iha fatin ketak, Akademiku UNTL, Sebastiao dos Santos dehan, importante duni estabelese ona sentru juvenil, se sentru juvenil la iha mak minoridade sira halo krime tenke liberta sira.
“Importante no urjente tenke harii ona sentru juvenil, ohin loron minoridade balu komete krime maibe sira labele iha responsabilidade kriminal, ho ida nee sentru juvenil mak sai hanesan alternativa ida atu bele asegura sira,” dehan nia.
Fundamenta tan, se ita la harii sentru juvenil la iha prevensaun, tanba minoridade balu hatene ona katak la iha responsabilidade kriminal, maibe se iha ona sentru juvenil sira mos hatene ona katak iha regra atu regula sira. Ho ida nee sai mos hanesan parte ida atu halo prevensaun.
Akademiku nee husu parte relevante sira atu tau importansia ba iha kestaun sentru juvenil, labele demora harii sentru juvenil tanba sei iha mos nia kauza. Nia parte mos husu inan aman atu kontrola oan sira, menus kontrola husi inan aman ikus mai halo aktu neebe lo-loos labele halo.
Aleinde nee, Direitor Sarvisu Prizional no Reinsersaun Sosial, Delfio Alves afirma, planu ona atu harii sentru juvenil, atu nunee bele asegura minoridade sira.
“Planu sei harii iha Tibar, ho sentru juvenil nee bele asegura minoridade sira neebe komete krime. Oras nee daudaun Prizaun Bekora mos iha dadur neebe idade sei joven, maibe tau sira iha bloku ketak, sira nia idade boot ona mak foin muda ba iha bloku adultu nian,” dehan nia.
(ter)
