LIQUICÁ, STLTIMORLESTE.com — Ministra Edukasaun, Dulce de Jesus Soares hamutuk ho Koordenadora Prinsipal Ekonomia Azul, Inês Araújo Gonçalves, no Prezidente Autoridade Munisípiu Liquicá, Paulino Ribeiro, halo lansamentu Programa Ekonomia Azul iha Munisípiu Liquicá, Segunda, 14 Setembru 2026.
Programa ho tema “Hau Nia Tasi, Hau Nia Timor” ne’e buka sensibiliza estudante, komunidade no entidade hotu atu kuidadu ambiente, liuliu tasi, no evita soe fo’er ho maneira arbitráriu.
Ministra Edukasaun, Dulce de Jesus Soares hateten katak, programa ne’e importante atu aumenta konsiénsia estudante no entidade hotu kona-ba proteksaun ambiente no importánsia ekonomia azul.
Nia esplika katak, Ministeriu Edukasaun servisu hamutuk ho Gabinete Fronteira Terrestre no Marítima, Autoridade Munisípiu Liquicá, eskola no entidade relevante sira atu halo kampaña sensibilizasaun kona-ba ekonomia azul.
Iha atividade ne’e, organizadór sira mos prepara ona fatin espesífiku ba “Lenuk Tasi” iha Jardim Heróis Munisípiu Liquicá, ne’ebé sei uza atu halibur fo’er, liuliu fo’er plástiku hanesan garrafa bee no material plástiku seluk.
Ministra Dulce de Jesus Soares mos apresia inisiativa husi Eskola Café Liquicá ne’ebé servisu hamutuk ho kompanhia Caltex atu rekolha no halo jestaun ba fo’er plástiku.
Tuir nia, estudante no profesór sira iha eskola ne’e rekolha garrafa bee mamuk no fo’er plástiku seluk, depois kompanhia relevante sira foti hodi lori ba prosesu resiklajen.
Ministra informa mos katak, inklui ona matéria kona-ba meiu ambiente no ekonomia azul iha kuríkulu edukasaun. Livru sira kona-ba matéria ne’e mos prepara ona atu apoia prosesu aprendizajen estudante sira.
Enkuantu ne’e, Prezidente Autoridade Munisípiu Liquicá, Paulino Ribeiro, garante katak programa sensibilizasaun ekonomia azul sei kontinua to’o nivel suku no aldeia.
Nia hateten, autoridade munisipál sei servisu hamutuk ho xefe suku no xefe aldeia atu esplika ba komunidade kona-ba importánsia ekonomia azul, inklui nia kontribuisaun ba kresimentu ekonomia no redusaun dezempregu iha nivel munisípiu.
Koordenadora Prinsipal Ekonomia Azul, Inês Araújo Gonçalves, hateten katak Governu Timor-Leste aprova ona polítika ekonomia azul iha Fevereiru 2026. Maibé, implementasaun polítika ne’e la bele depende de’it ba Governu, maibé presiza partisipasaun husi komunidade, estudante, entidade sira no jornalista.
Nia husu apoiu husi jornalista sira atu habelar no dissemina informasaun kona-ba ekonomia azul, no husu estudante sira atu partisipa ativu iha implementasaun programa ne’e.
Lansamentu programa ekonomia azul iha Liquicá ne’e partisipa husi estudante no profesór sira, autoridade lokal, autoridade seguransa no entidade sira seluk.
Ekonomia Azul mak sistema ekonomia ne’ebé uza rekursu tasi no área kosteira ho maneira sustentável, atu promove kresimentu ekonomia, kria oportunidade empregu no hadi’a moris komunidade, enkuantu nafatin proteje saúde no sustentabilidade ekosistema tasi.
(leo)
