DILI, STLTIMORLESTE.com – Prezidente Republika (PR), Jose Ramos Horta hatoo agradese ba Vietnam, tanba apoiu Timor Leste (TL) nia prosesu ba Adezaun ASEAN.
Prezidente Republika hatoo agradese nee bainhira halo vizita kortezia ida ba Jeneral, To Lam, Sekretariu Jeral Partidu Komunista Vietnam iha Hanoi.
Iha enkontru nee, Prezidente Ramos Horta hatoo agradesimentu ba Vietnam nia apoiu kontinua ba Timor Leste nia prosesu ba adezaun tomak ba ASEAN.
Iha biban nee, To Lam, Sekretariu Jeral Partidu Komunista fo benvindu ba Prezidente Ramos Horta no agradese ba prezensa iha Forum Futuru ASEAN nian ba dala 2 tinan ida nee, hodi destaka kreximentu exelente dezenvolvimentu no relasaun bilateral entre nasaun rua nee.
Jeneral To Lam nota Vietnam nia objetivu atu dezenvolve ba nasaun ida ho rendimentu aas no espresa esperansa ba kooperasaun estratejiku ho Timor.Leste, enkuantu reafirma nafatin Vietnam nia apoiu ba Timor Leste nia adezaun ba ASEAN.
Prezidente Ramos Horta observa katak, dezde ninia vizita ikus ba Vietnam iha fulan neen liu ba, Timor Leste halo ona progresu signifikativu.
“Iha tinan 2025, ita nia Governu sei foka ba infraestrutura, estrada nasional no rural, agrikultura, no eskola sira,” dehan PR Horta liu husi komunikadu neebe STL husi Media PR, Kuarta (26/02/2027).
Prezidente temi Timor Leste nia planu atu harii aeroportu foun, dezenvolve portu Dili tuan, kombate kiak no malnutrisaun, no habelar parseria ho Vietnam iha area sira hanesan agrikultura no komunikasaun.
Durante enkontru, Prezidente Ramos Horta sublina progresu iha aumentu parseria komersial sira ba atualizasaun konetividade no ligasaun fiu submarinu. Kona-ba adezaun ba ASEAN, Prezidente hatudu optimizmu katak ida nee bele akontese iha simeira ASEAN nian iha Outubru ka Novembru 2025.
Kona-ba kontribuisaun potensial Timor Leste nian ba ASEAN, nia afirma, “Ita mantein ita nia nasaun iha pas no estabilidade, ita la lori problema ruma ba ASEAN, hodi hatutan katak “Timor Leste servisu makaas iha linha oin hodi kria burokrasia ida neebe amigavel ba ambiente negosiu,” katak Horta.
Prezidente hatoo kona-ba fundu soberanu Timor Leste nian no oportunidade atu halo investimentu iha Vietnam. Sekretariu Jeral To Lam simu ho laran haksolok sujestaun sira ba inisiativa konjunta dezenvolvimentu nian, hodi afirma katak Vietnam laiha kestaun ho Timor Leste no nasaun rua iha konsensu iha aspetu hotu-hotu. Nia haktuir hikas apoiu Vietnam nian ba Timor Leste sai membru foun ba ASEAN.
(eme)
