DILI, STLTIMORLESTE.com – Prezidente Republika (PR), Jose Ramos Horta hatete, nia sente hakfodak no orgulhu bainhira haree Timoroan eskola iha Bangladesh iha lian ingles.
Prezidente Republika Jose Ramos Horta hatoo kestaun nee ba jornalista sira, bainhira remata halo vizita estadu ba iha Nasaun Bangladesh no fila hikas mai iha Timor Leste iha Aeroportu Internasional Nicolao Lobato, kuarta (18/12/2024).
“Hau hakfodak no hau nunka rona Timoroan balun iha neeba, maibe interesante mos sira nia insiativa rasik, ho universidade privadu ida iha neeba, Universidade lingua Ingles, Universidade ida nivel internasional, profesor doutor Muhamad Yunus Primeiru Ministru Interinu rasik rekonhese, nia hatete, Universidade nee diak,” dehan PR Horta.
Prezidente Republika dehan, estudante sira hetan eskola Sip, kompletu husi Universidade nee rasik, sira la selu buat ida, hahan no toba fatin mos diak.
“Estudante Timoroan kontente koalia Ingles mos, estuda area medisina, sensia mediku biologia. Estudante Timoroan preokupada liu mak, tanba la iha embaixada iha neeba, la iha konsuladu, entaun dala ruma kuandu iha problema, sira la hatene se mak kontaktu,” katak PR Horta.
Prezidente Republika, José Ramos Horta palestra publiku iha Bangladesh Institutu of International and Strategic Studies (BIISS) fahe esperiénsia Timor Leste nian, tanba nee mansajen ba sira hotu, Bangladesh tenke sai hanesan konhesidu hanesan pais pas iha trankulidade, labele iha instabilidade.
Iha Banglaadesh PR Horta hatoo palestra publika iha Institutu Estudu Internasional no Estratejiku Bangladesh nian (BIISS) kona-ba Dezafiu ba Pas iha Mundu Kontemporaneu.
Prezidente Republika halao sorumutu iha salaun munisípiu ho estudante no líder juventude sira, hodi fahe ninia esperiensia sira kona-ba Timor Leste nia luta ba independensia, viajen lideransa nian, no aspirasaun nasaun nian hafoin independensia.
Aleinde nee relasiona ho asidente neebe mak akontese iha Palasiu Prezidensial neebe mak rejulta jornalista SMNEWS kanek, ida nee Prezidente Republika Jose Ramos Horta ladun preokupa tanba nee asidente kiik ida no joven balun mak nakar, tanba nee prosesu lao ona.
Prezidente Republika dehan la preokupa, tanba joven balun mak nakar halo problema, polisia kaer ona joven balun hodi halo prosesu.
Polisia kaptura ona, hein prosesu tuir mai, tuir kondisaun neebe merese sira hetan. Insidente nee laos problema boot ida.
“Ita labele preokupa ho labarik oan balun baku malu, nee sai hanesan problema nasional ida, portantu hau la preokupa ho ida nee,” katak PR Horta.
(eme)
