DILI, STLTIMORLESTE.com – Prezidente Republika (PR), Jose Ramos Horta hasoru malu ho Mohamed Shahabuddin iha Bangabhaban-Dhaka no asiste resesaun loron vitoria Bangladesh nian ba dala-54.
Haktuir komunikadu neebe mak STL asesu husi media PR, Tersa nee (17/12/2024).
Xefe Estadu Ramos Horta akompanha husi Ministru Negosiu Estranjeiru, Bendito Freitas ho delegasaun halao sorumutu ho Honoravel Prezidente Bangladexe nian, Mohammed Shahabuddin, iha Bangabhaban-Dhaka. Iha sira nia enkontru nee foka ba hasae relasaun bilateral sira no esplora area kooperasaun potensial sira hodi aselera dezenvolvimentu iha nasaun rua nee.
Tuir sira nia diskusaun, Prezidente Shahabuddin no Primeira Dama Dra. Rebeka Sultana mak sai uma nain ba resepsaun Loron Vitoria Bangladexe nian ba dala 54.
Serimonia nee hahu ho toka Hinu Nasional Timor Leste nian “Patria-Patria” no tuir kedas ho Hinu Nasional Bangladesh nian. Prezidente Ramos Horta marka prezensa nuudar bainaka espesial no partisipa iha serimonia tesi bolo iha resintu VVIP.
Resepsaun nee partisipa no halibur bainaka distintu oioin, Delegasaun husi Timor Leste, Embaxador sira, membru sira husi konselhu asesor sira no komisariu aas sira hosi nasaun oioin. Eventu nee sublina signifikadu husi loron nee no destaka relasaun manas entre Bangladesh no Timor Leste.
(eme)
