DILI, STLTIMORLESTE.com – Prezidente Republika (PR), Jose Ramos Horta husu Autoridade Lokal kuandu identifika komunidade neebe moris vulnerável no hela uma la diak ou laiha hahan bele hatoo ba Prezidensia Republika, nunee bele apoiu.
Prezidente Republika Jose Ramos Horta hatoo kestaun nee liu husi nia diskursu bainhira entrega nesesidade baziku ba vitima inundasaun iha Suai Loro, Tersa (28/04/2026).
PR husu autoridade lokal karik hetan komunidade neebe hela uma la dignu ka lahan la hemu bele hatoo direita ba Prezidensial Republika nunee bele fo apoiu.
“Xefe Suku, Xefe Aldeia, ita boot sira rona karik hatene karik familia ruma, uma kain ruma kuandu moris susar tebes labele hein, avija kedas Xefe Aldeia Xefe Suku halo kontaktu ho Prezidensia iha Dili ami buka ajuda kedas, labele iha familia ida uma kain ida ke ema lahan, labele iha familia ida hela iha uma ida aat no aat los, husu ami halo kedas fulan rua fulan tolu uma nee prontu uma oan ida,” dehan Prezidente Republika.
Xefe Estadu hatete, durante nee Prezidensia Republika book lais hodi fo apoiu ba komunidade Vuneravel sira, nomos halo uma dignu tanba Prezidensia halo buat kiik no Governu halo planu boot ba dezenvolvimentu nasional tanba nee konaba apoiu sira nee PR tun hodi fo apoiu.
“Prezidente book aan lalais liu tanba halo buat kiik, Governu halo planu bobot sira nee, estrada oin oin, entau Prezidente halo buat kiik oan sira nee, ohin hau simu imformasaun ohin kedas hau asina semana ida nia laran orsamentu iha ona,” dehan PR Horta.
Xefe Estadu hatete kuandu iha avo ferik, katuas ruma oan kiak kuandu fatin toba laiha hahan laiha tenke fo hatene kedas.
“Avo ferik, katuas ruma, oan kiak ruma kuandu fatin toba laiha, hahan laiha imi tenke fo hatene kedas,” katak Pr Horta.
Durante nee Prezidensia Republika apoiu halo uma dignu ba komunidade neebe vuneravel nomos apoiu mos ba hahan ba vitima sira neebe kuran hahan.
Aleinde nee Xefe Suku Suai Loro, Manuel Gomes da Costa hatete Prezidente Republika mos ohin hameno ona ba Xefe sira katak bele identifika komunidade neebe mak uma hetan ladiak no moris vuneravel bele kontaktu ba prezidensia Republika maibe nuudar autoridae sei komfuzaun tanba parte Prezidensia Republika numeru laiha.
“Ami dezezu tebes ho deklarasaun nee soke kestaun mak atu liga ba Prezidensia nee husi neebe tanba ami laiha numeru kontaktu, pelumenus iha numeru kontaktu ba nunee komuga ba katuas nia mensajen, maibe ida neebe difikulta ami mak laiha kontaktu se iha numeru kontaktu ami hetan komunidade vuneravel hanesan ohin katuas koalia bele liga kedas nunee prezidensia bele hatene katak povu nee moris vuneravel duni,” katak Xefe Suku.
Total populasaun iha Suku Suai Loro komposto husi aldeia 5 ho habitante hamutuk 4.893 kompostu husi mane 2.468 no feto 2.421, no total uma kain 1.293.
Durante nee Prezidensia Republika sempre apoiu komunidade neebe moris Vuneravel liu liu ba sira neebe oan kiak kuran ba aihan nomos inan aman neebe hela uma la dignu Prezidensia buka fo apoiu halo uma nomos apoiu hahan.
Balun autoridade lokal mak lori proposta ba Prezidensia Republika, balun husi media sosial, bainhira hetan ona imformasaun Prezidensia Republika tun direita halo observasaun haree direita kuandu identifika katak sidadaun nee vuneravel fo apoiu kedas.
(eme)
