DILI, STLTIMORLESTE.com – Prezidente Republika (PR), Jose Ramos Horta konkorda ho desizaun Governu atu taka Empreza Publika (E.P) no Institutu Publika (I.P).
Prezidente Republika, Jose Ramos Horta hatete liafuan nee ba jornalista sira iha Kantina Matak Palasiu Prezidensial Nicolao Lobato, Bairo Pite, Tersa (25/03/2025).
Horta hatete, bainhira nia simu proposta dekretu lei husi Governu atu taka E.P no I.P, Prezidente Republika sei taka matan halo promulgasaun, tanba I.P ho E.P ho salariu boot maibe la hatama reseitas ba estadu, tanba nee Prezidente Republika konkorda atu taka.
“Hau konkorda E.P iha rai ida nee, iha rai doben ida nee barak demais governu sira anterior politika sira mak inventa tun sae Institutu Publiku. Iha rai seluk iha maibe ita bolu institutu publiku, nee nia rasik mak hatene hatama osan, tanba hatama osan boot entaun tenke halo jestaun nuudar empreza komersial ida,” katak PR Horta.
Prezidente Republika hatete, institutu publiku no empreza publika maske empreza komersial ida tenke hatama osan boot, se hatama osan boot mak Diretor Institutu nee bele simu salariu vensimentu estra ho bonus, tinan-tinan simu osan boot tanba hatama osan boot.
“Hau konhese Diretor Empreza Publika balu iha rai liur neeba, iha Portugal no iha Fransa ema sira nee manan osan boot, tanba ema hatama osan milhões dolares, ita nia lae nein duit metan ida, eletrisidade la hatene kaer no eletrisidade nee estraga ema nia sasan komputador makina hospital nian iha hospital mos estraga barak, iha Baukau fasilidade hospital nia estraga tanba eletrisidade,” katak PR Horta.
Prezidente Republika hatete, maske I.P ho E.P simu salariu boot liu Prezidente Republika, maibe laiha reseitas ba Estadu, tanba nee mak Prezidente Republika konkorda taka.
(eme)
