DILI, STLTIMORLESTE.com – Prezidente Republika (PR), Jose Ramos Horta la konkorda ho desizaun husi Ministra Saude, neebe hasai sirkular hodi bandu mediku sira halo atendimentu iha Klinika Privadu sira.
Prezidente Republika hatoo kestaun nee ba jornalista sira iha Hotel Timor, Kinta nee (12/12/2024) hatete, se karik hakarak bandu presiza mos hasae salariu mediku sira no kria mos kondisaun ba sira.
“Iha Timor Leste seidauk iha kondisaun para halo ida nee, iha rai neebe doutor barak los ona, no selu diak ba doutor sira servisu iha hospital publiku selu sira diak, entaun bele bandu ba servisu iha fatin seluk, mais deputadu sira manetek boot estudu boot los manan mos boot maibe doutor sira be estudu tinan 6 no tinan 7 too 10 loron-loron sira mak iha perigu, hospital haree ema nia moras, tanba loron tomak iha hospital o rasik bele moras, tanba bakteri, hospital nee perigozu maibe manan osan fraku, laos bandu tan fali labele halo servisu iha klinika privadu, Klinika Privadu sira mos araska nee duni hau la konkorda,” katak PR Horta.
Xefe Estadu hatete, nia parte la konkorda ho desizaun husi Ministra Saude bandu mediku sira halo atendimentu iha klinika privadu sira, se bainhira bandu tenke aumenta osan ba mediku sira.
“Ba oin tinan 10 tan bele haree ida nee, maibe aumenta doutor sira nia vensimentu laos vensimentu deit, maibe aumeta iha orsamentu para permite doutor sira estuda nafatin, para sira bele sosa ekipamentu sosa livru, tanba doutor nee nia tenke estuda loron-loron kuandu tinan ida tinan rua la estuda nee susar ona,” katak PR, Horta.
Nia dehan, bainhira Governu la prepara kondisaun ba mediku sira nee sei susar, tanba nee husu atu aumenta orsamentu, nunee mediku sira bele sosa sira nia ekipamentu nomos kontinua estuda, nunee bele atende povu nee ho diak no matenek kapasidade.
Visi Primeiru Ministru, Mariano Assanami Sabino hatete, karta sirkular neebe mak antes nee Ministra Saude, Elia dos Reis hasai hodi bandu mediku sira halo atedimentu iha klinika privadu sira nee parte husi rezolusaun.
Antes nee mos Ministra Saude, Elia dos Reis hasai karta sirkular ida hodi bandu mediku sira halo atedimentu iha klinika privadu, nunee fokus halo atendimentu ba pesiente sira iha hospital publiku sira nomos Hospital Nasional Guido valadares.
(eme)
