Horta: Ordenamentu Teritorial, Presiza Konsensus Nasional

Prezidente Republika (PR), Jose Ramos Horta. (Foto: Media PR)

DILI, STLTIMORLESTE.com – Prezidente Republika (PR), Jose Ramos Horta hatete, planu Governu halo ordenamentu territorial ida nee politika diak, maibe presiza iha konsensus nasional, nunee se deit mak kaer fali Governu kontinua.

Prezidente Republika Jose Ramos Horta hatoo kestaun nee ba jornalista sira iha Kantina Matak Palasiu Prezidensial Nicolao Lobato, Bairo Pite Tersa (28/01/2025).

PR hatete, politika husi IX Governu kona-ba ordenamentu territorial nee politika diak, maibe presiza iha konsensus nasional husi parte hotu-hotu, nunee se mak kaer fali Governu kontinua deit, se laiha konsensus too kampanha partidu ida halo kampanha katak kaer ukun komunidade neebe halo eviksaun ba hela fali fatin entaun susar.

Prezidente Republika hatete, nia konkorda kona-ba politika nee, maibe presiza iha konsensus nomos bainhira hasai sidadaun sira iha fatin neebe mak identifika fatin risku ka hela iha rai estadu presiza fo kompensasaun, laos ba duni deit.

“Hau konkorda ordenamentu territorial ordenamentu sidade planeamentu nee devia halo tinan 20 ona devia Konsensus Nasional, se lae Governu foun ida mai eleisaun mai tanba hakarak hetan votus entaun dehan ami la konkorda, imi bele fila ba fatin nee, tanba nee tenke iha dialogu ida iha parlamentu iha sosiedade sivil para haree saida los mak bele halo, laos derrepente duni ema sai hatete nee tuir ordenamentu, hau mos seidauk haree ordenamentu nee,” katak PR.

Prezidente Republika hatutan, Governu iha razaun atu hadia sidade kapital nasaun, maibe presiza haree didiak mos servisu saneamentu no prepara mos fatin ba negosiante sira.

“Hau konkorda Governu iha razaun para halo displina sidade nee, maibe haree didiak servisu saneamentu para hamoos sidade nee loron-loron, atu ema faan iha luron husik faan ba organiza sira faan tuku hira, sai tuku hira, buka tau meza sira tau sasan ba, laos idak-idak nahe faan sasan iha rai iha sidade barak sira halo, nunee iha kupan sira halo nunee, Bangkok sira halo nunee,” dehan PR Horta.

Iha biban nee, Prezidente Republika husu sidadaun sira labele halo uma iha fatin sira neebe mak risku hanesan iha mota laran, rai lolon, tanba nee sei fo risku ba vida.

PR dehan, Governu hakarak hadia kapital sidade, antes halo eviksaun hasai ema tenke halo dialogu didiak, koalia didiak no buka kedas solusaun katak sai husi fatin ba kedas iha neebe, halo kompensasaun, entrega ona osan mak lori eskapator mai soru.

“Laos halo hanesan senhor Jermano halo lori kedas polisia, militar ba sobu baku ema, hau mos la konkorda,” katak PR Ramos.

Aleinde nee hasai negosiante sira neebe mak faan iha etrada presiza mos kria kondisaun, Governu mos presiza iha planu halo merkadu neebe mak kualidade no merkadu foun modernu diak iha bairu-bairu, kada suku, depois labele husik, tenke organiza.

Nunee mos Visi Diretor Hak, Antonino de Limas hatete, planu Ordenamentu Territorial nee politika diak oinsa hadia nasaun, maibe bainhira hasai sidadaun sira tenke ho dignu no presiza mos fo kompensasaun ba sira.

Antes hasai presiza halo dialogu ho komunidade sira, no fo mos garantia ba sidadaun sira liu husi fo kompensasaun ruma, nunee sira sai ho diak, laos uza forsa ba hasai no la prepara kondisaun ruma ba sira.

(eme)

Share it :

Leave a Reply

Your email address will not be published. Required fields are marked *