DILI, STLTIMORLESTE.com – Prezidente Republika (PR), Jose Ramos Horta hatete, Portu Tibar nia klasifiksaun um melores iha Sudeste Aziatiku tomak.
Prezidente Republika, Jose Ramos Horta ba jornalista sira, bainhira remata halo vizita ba Portu Tibar, Kinta (13/03/2025) hatete, nia laos foin premeiru vez vizita Portu Tibar, maibe vizita dala hira ona, no tuir Prezidente Portu ida nee bele klasifikadu hanesan um de melores Sudeste Aziatiku tomak.
“Laos primeiru vez mai iha Portu Tibar, kleur ona hau mai no tempu Covid-19 hau mai haree servisu iha nee, momentu neeba hau sei eis Prezidente, depois kuandu prontu ona maibe seidauk inaugurasaun hau mai ho maun Boot Xanana, liu-liu nia mai hakarak komprimenta Timoroan sira servisu iha nee, enjenheiru sira neebe servisu iha nee fo apoiu moral agradesimentu ba sira, depois hau mai inaugurasaun,” katak PR Horta.
Prezidente Republika hatete, vizita Portu Tibar nee dala rua ona no mai hamutuk ho Embaixador lubuk ida nain 50 hanesan nee, sira hotu empresiona los ho infraestrutura ida nee.
“Nee primeiru infraestrutura ho baze iha PP hahu iha 2014 ho Governu neebe lideradu husi maun boot Xanana, investimentu boot involve ita nia governu, ita nia estadu ho parseru sira seluk, obra nee konkursu Chaina Harbor mak manan halo parte konstrusaun nee.
Portu ida nee bele klasifikadu hanesan um de melores Sudeste Aziatiku tomak, intermus de modernu portu klean, ita sorte duni momentu neeba 2014 Governu lideradu husi maun Boot Xanana halo desizaun ida nee tanba laos fasil, primeiru vez halo buat ida PP osan boot, nee presiza korajen politika estudu klean para halo desizaun nee,” katak PR Horta.
PR dehan, desizaun neebe foti husi Lider karismatika Xanana Gusmão nee desizaun neebe los duni importante ba Timor Leste nia integrasaun ekonomia komersia.
“Desizaun nee los duni importante ba ita nia integrasaun ekonomia komersiu rejional importante ba ita nia adezaun ba ASEAN, tanba ASEAN kondisaun ida mak infraestrutura, infraestrutura importante indispensavel ba ita nia adezaun ASEAN intermus ita nia integrasaun ekonomiku mak portu,” katak PR Horta.
Nia hatutan, kriteria Timor Leste atu sai membru ASEAN importante ida infraestrutura, aleinde nee intermus integrasaun ba ekonomiku mak portu.
Prezidente dehan, portu no aeroportu, estrada nasionais, estrada rurais, buat sira nee hotu importante tebes ba ekonomia bele funsiona ho lo-loos.
“Konforme brifin informasaun neebe hau simu hau agradese ba Primeiru Ministru, agradese ba Ministra Finansas no Ministru Agrikultor neebe mai hasai sira nia tempu, hau mai so hatene deit simu informasaun tanba papel prezidente nia ida hatene buat neebe lao iha rai nee, tenke konhese faktus, tenke konhese informasaun, entaun hau sempre buka saude lao oinsa, agrikultura lao oinsa, dezafiun no problema saida, Governu halo saida, buat sira nee hotu,” dehan PR Horta.
Tanba nee mak Prezidente Republika husu aktualizasaun update funsionamentu operasional Portu Tibar.
Prezidente dehan, Portu Tibar sistema modernu los sira despaicho naviu sira mai nee tempu badak no lalais laos hanesan uluk iha Portu Dili ke portu kiik kuaze bele hatete manual roo boot neebe labele tama maibe iha Tibar lae roo boot bele tama.
Iha biban nee, Prezidente Republika husu funsioriu Portu Tibar tenke servisu ho fuan laran no servisu ho orgulhu, tanba nee reprezenta ba mundu no intrese komersial no Prezidente mos nafatin fo konfiansa ba funsionariu sira hanesan defeza no seguransa hanesan institusaun seluk estadu nia neebe importante tebes.
(eme)
