DILI, STLTIMORLESTE.com – Prezidente Republika (PR), Jose Ramos Horta hatete, ohin loron Timor Leste (TL) selebra nia indepedensia ba 24 anos iha mudansa kompara ho tempu uluk bainhira TL seidauk hetan independensia.
Prezidente Republika Jose Ramos Horta ba Jornalista iha Aeroportu Internasional Nicolau Lobato, Komoro, Kinta (15/05/2026) hatete, ninia diskursu ba selebrasaun 20 maiu hodi komemora 24 anos independensia prepara hotu ona, no tuir Prezidente nia haree Timor Leste iha mudansa kompara ho tempu uluk.
“Hau nia diskursu prepara dadaun hahu remata ona hau halo balansu ba tinan 20 resin hanesan foin dadaun dadersan iha Darwin koalia mos ho estudante universidade sira, hau hatete ita hateke ba kotuk iha 2002 Timor iha neebe? Rabat rai liu kiak liu ohin iha neebe ba kotuk iha violensia iha problema oin oin, instabilidade, ohin iha neebe laiha violensia politika, laiha tensaun etniku ka relizaun,” dehan PR Horta.
Prezidente Republika hatete ohin loron krime neebe forte no omisidiu la aas, violensia domestika iha duni no Prezidente temi bebeik, maibe laiha asaltu ho kilat ba loza no banku sira.
“Buat ida ke hau hatete iha mundu kuandu hau hatete sira hakfodak, Timor kiak maibe laiha ema husu esmola iha luron, labarik sira ida kiak nee sira latane liman sira faan sasan buka moris nee povu ida espesial tebes orgulhu tebes sira admira ho hotu hotu nee, hau sempre hatete ita nia forsa armada, ita nia polisia ita bele hatete komportamentu pozitivu tebes,” katak Horta.
Xefe Estadu hatete, kuandu rona NGO Ruma kuandu buat hotu iha Timor diak sira neebe koalia konaba direitus humanus nee tenke taka tiha odamatan, maibe sira lakohi taka odamatan sira tenke hatete katak Polisia halo violensia forsa Armada halo violensia no Governu laiha Liberdade.
“Maibe observador Internasional sira hatete Timor Leste nia demokrasia numeru um no numeru dois iha ASEAN Fredom media aas tebes portantu ida nee mak ita hatete 24 anos liu tiha mehi atu hetan vida diak liu mos akontese, hau hatete kareta rihun ba rihun iha Dili laran nee laos embaixada nia, Timor oan sira nia atu solda kareta nee laos visikleta ida restaurante Dili laran nakonu Timor oan mak ba tinan 20 liu ba ONU mak nakonu iha estrada buat sira nee, Timor oan ferias iha Indonezia atus ba atus,” katak PR Horta.
Xefe Estadu hatete, ohin loron Timor oan balun mos haruka nia oan halao estudu iha Portugal familia mak selu kondisaun diak liu maibe problema barak mak labele taka matan pobreza sei aas, sub nutrisaun sei aas maibe ho komitmentu Governu, Premeiru Ministru nia Prezidente nia hanoin tinan ida nee mai nee sei tun liu tan Tuir Prezidente katak husi Indepedensia mai nee iha mos mudansa barak.
Xefe Estadu haktuir tan katak, iha 2002 Timor Leste iha neebe doutoradu ida deit mak Dr Lucas Costa, maibe ohin loron doutoradu, mestradu, no Psd barak los ona iha Timor Leste no Universidade mos uluk ida deit maibe ohin loron universidade barak ona.
Nia hatete, uluk Timor oan ida moris nia bele espera moris deit too 57 anos maibe agora mehi bele moris too 70 anos idade nee mak dadus estatistika tuir progresu moris.
Ema balun kritika Timor oan balun hela iha Portugal, balun hela iha Australia, balun hela iha rai laran rasik mos sira hakarak haree Timor lao lalais liu tan, simu kritika para oinsa halo diak liu tan.
(eme)
