DÍLI, STLTIMORLESTE.com – Ministeriu Edukasaun (ME) husu ba ema hotu ne’ebé hakarak legaliza diploma ensinu baziku atu lori diploma orijinál. Ema ne’ebé la lori diploma orijinál sei la hetan atendimentu, salvu iha deklarasaun ofisiál ba diploma ne’ebé estraga ka lakon.
Diretór-Jerál Ensinu Pré- Eskolár, Ensinu Baziku no Ensinu Rekorrente, Apolinário Serpa Rosa, hato’o informasaun ne’e ba STL, iha salaun Ian Martin Balide, Kinta (29/10/2026).
Apolinário esplika katak, servisu legalizasaun diploma iha ME ne’e atu atende estudante sira ne’ebé remata ona ensinu baziku iha munisípiu, maibé agora hela iha Dili no la konsege fila ba munisípiu atu halo legalizasaun.
“Ha’u hanoin legalizasaun diploma nian ba n i bel ensinu baziku, ita atende ema sira ne’ebé mai husi munisípiu, sira ne’ebé remata iha munisípiu maibé agora hela iha Dili no la konsege ba munisípiu. Ida-ne’e mak ita halo atendimentu ba sira iha ME. Nee duni, depende ba ema ne’ebé mai legaliza diploma,” nia afirma.
Nia hatutan katak, kada loron servisu legalizasaun diploma bele atende ema na’in 10 to’o 20, maibé dadus loos kona-ba númeru atendimentu loroloron nian presiza konfirma fali ho funsionáriu sira ne’ebé responsavel ba servisu ne’e.
Apolinário hatete katak, atu legaliza diploma, ema ida-idak tenke lori diploma orijinál no fotokópia diploma tahan lima.
“Kuandu mai la lori diploma orijinál, ne’e ita la atende. Kuandu diploma orijinál laiha tanba hetan estragu ka lakon, presiza iha deklarasaun. Edukasaun munisípiu fó deklarasaun ba na’in diploma ne’ebé lakon, depois mak lori hamutuk ho fotokópia. Ida-ne’e mak durante ne’e ita halo,” nia dehan.
(jac)
