DILI, STLTIMORLESTE.com – Inan aman nia papel importante iha familia, oinsa mak bele eduka oan sira hodi hadook aan husi hahalok violensia sira.
Lia hirak nee hatoo husi Segundu Komandante Eskuadra Vera Kruz, Gaspar Lopes ba jornalista sira iha Salaun HAK, Farol, Dili, Kinta nee (27/02/2025) hatete, tuir sira nia haree problema neebe mosu iha sosiedade nia leet maioria husi joven sira, tanba nee husu inan aman sira nafatin tau matan ba oan sira, nunee bele hadook aan husi hahalok violentu.
“Hau nuudar seguransa, hau hatene problema mosu iha sosiedade nia leet nee kazu nee mosu husi juventude sira, juventude sira mak sempre halo problema iha fatin fatin, tanba nee husu ba joven sira envolve aan iha edukasaun, no involve aan iha atividade ruma, nunee halakon hanoin konflitu, tanba bainhira sira envolve iha atividade ruma sira sei haluha tiha hanoin aat sira,” dehan nia.
Segundu Komandante Eskuadra Vera Kruz née hatete, joven mak futuru ba rai ida nee, tanba nee husu atu envolve aan iha atividade neebe bele motiva ba dalan diak nia, tanba problema la manan buat ida.
Nia hatutan, joven neebe buka problema tanba ransu livre no involve iha grupu grupu, entau sira influensia malu hodi monu ba tensaun, ikus balu tenke lakon vida, balu kanek, inan aman mos papel importante oinsa mak bele eduka oan sira husi uma laran, bainhira lao sala dalan bolu fo hanoin ba dalan neebe diak, nunee sira bele hadook aan husi hahalok violensia hotu.
“Inan aman mos tenke fo atensaun nafatin ba nia oan sira, tanba ita nuudar inan aman ita nia responsabilidade boot tebes ba oan sira, bainhira sira boot ona harii ona uma kain mak ita husik, maibe durante iha ita nia sorin, sira nafatin iha ita nia responsabilidade bolu fo atensaun nafatin, nunee sira labele monu iha konflitu no monu iha problema neebe ema hotu lakohi atu akontese,” katak nia.
Nunee mos OPS Suku Kamea, Jaime de Andrade hatutan, Formasaun kona-ba Direitus Umanus nee sei la para, maibe sira sei kontinua habelar iha sosiedade nia leet, nunee bele fo motivasaun ba joven sira atu hadook aan husi krimi sira.
“Sei kontinua ba komunidade liu-liu ba suku no aldeia atu nunee bele fo motivasaun ba joven sira, nunee joven sira bele hadook aan husi krimi oinsa atu bele atinzi dezenvolvimentu iha ita nia nasaun,” katak nia.
Nia hatete, nasaun presiza hakmatek, nunee ukun nain sira bele halo dezenvolvimentu iha rai laran tuir planu neebe sira iha.
Nunee mos Akademista Judite Ximenes hatutan, joven mak futuru ba rai ida nee, tanba nee husu atu hadook aan husi hahalok aat sira.
Nia hatutan, dala barak mos mosu problema tanba balu frustasi, tanba eskola hotu balu laiha servisu, tanba nee Estadu mos presiza buka oinsa bele rezolve, no buka hatene kauza husi problema neebe iha sosiedade nia leet.
(eme)
