BAUKAU, STLTIMORLESTE.com – Ministeriu Saude liu husi Institutu Nasional Kombate HIV-SIDA komemora loron mundial HIV-SIDA iha Munisipiu Baukau.
Informasaun nee hatoo husi Prezidente INCSIDA I.P, Daniel Marcal liu husi diskursu, hafoin komemora loron mundial ba HIV-SIDA, iha vila Antiga, Baukau, Segunda (02/12/2024).
“Hau agrdese ba Xefe Suku no Xefe Aldeia sira neebe kopera diak tebes organiza ita nia ema hodi mai rona informasaun oinsa atu proteje no salva aan husi HIV-SIDA no hamutuk parseiru internasional, nasional no lokal komemora loron importante ida nee,” dehan nia.
Daniel konsidera, komemorasaun refere atu fo hanoin ba entidades hotu iha territoriu nasional hodi konsolida forsa hodi proteje no salva sidadaun Timoroan husi transmisaun HIV-SIDA, tanba dadaun afeta ona ema barak no konsege hamate ona balun.
Tuir dadus anivel Nasional, sidadaun Timor Oan neebe afeta ona transmisaun HIV-SIDA neebe rejistu husi tinan 2008-2024 hamutuk 2.149, maioria partisipa husi jovem estudante sira idade husi 15-35 mak kontribui boot tebes, tanba nesesidade gostu neebe susar atu kontrola aan, neebe konsege nain 300 resin mate.
Nunee mos Reprezentante Organizasaun Saude Mundial iha TL, Arvind Mathur hateten, HIV sai dezafiu global iha rejiaun sudeste asia neebe reprezentante 10% husi ema hotu neebe moris ho HIV iha nivel global 13% mate relasiona ho SIDA.
Tuir nia, Timor iha HIV neebe kiik ho 0.2% husi populasaun jeral, maibe prevalensia signifikativa aas liu grupu vuneravel sira neebe atinji 1.3% entre mane no 1.2% entre trabalhador feto sira.
Dadus sira nee hatudu kona-ba progresu signifikante neebe Timor-Leste halo ona iha jornada luta kontra HIV, husi ema sira neebe moris ho HIV 82% hatete ninia estatua HIV, no inpresionate 77% halo tratamentu inklui aumentu signifikante 13% husi tinan 2022.
Enkuantu Prezidente Autoridade Munisipiu (PAM) Baukau, Veneranda Lemos preokupa kazu transmisaun refere, tanba afeta ona ba sidadaun barak iha Munisipiu Baukau.
No liu husi komemorasaun loron mundial HIV-SIDA neebe realiza iha Munisipiu Baukau, atu fo hanoin ba sidadaun hotu jovem feto mane inklui kazadu kazada sira atu nafatin proteje aan husi ransu livre.
Tanba kauza husi ransu livre (buka dapur iha liur) Timor Leste rejistu ona kazu HIV-SIDA hamutuk rihun 2 resin, kompostu feto-mane neebe inklui mos rejistu afetadus nain 60 resin husi Munisipiu Baukau.
(EST 2)
