INDDICA Hametin Protesaun Labarik Migrante

DÍLI, STLTIMORLESTE.com – Institutu Defeza Direitu Labarik nian (INDDICA) realiza formasaun nasionál kona-ba hametin koordenasaun, protesaun no kuidadu ba labarik sira iha kontestu migrasaun.

Formasaun ne’e envolve ministériu, instituisaun governamentál no sosiedade sivíl, ho objetivu atu hametin kooperasaun interinstitusionál ba protesaun labarik vulnerável.

Reprejentante Prezidente INDDICA, Sekretária Ezekutiva, Angelina Maria Ximenes, konvida instituisaun relevante sira atu kolabora hamutuk hodi garante kuidadu ba labarik sira ne’ebé inan-aman husik hela tanba servisu iha rai li’ur.

Nia esplika katak, labarik sira iha kontestu migrasaun enfrenta risku oioin, inklui falta supervizaun família, esplorasaun, violénsia no tráfiku umanu.

Angelina afirma katak, direitu labarik nian tenke proteje nafatin, la haree ba sira-nia estatutu migrasaun, orijen ka maneira movimentu.

“Ita hotu iha responsabilidade atu asegura protesaun ba labarik sira hasoru esplorasaun, tráfiku no diskriminasaun,” Angelina dehan.

Nia hatutan katak, protesaun labarik iha kontestu migrasaun tenke bazeia ba Konvensaun Nasoins Unidas kona-ba Direitu Labarik nian.

Prinsípiu importante sira inklui direitu ba edukasaun, saúde, apoiu legál, protesaun no direitu atu la haketak husi inan-aman.

Formasaun ne’e mós aborda nesesidade atu dezenvolve sistema protesaun nasionál ne’ebé inkluzivu, hodi garante labarik hotu hetan asesu ba servisu esensiál.

Diretór-Jerál Protesaun Sosiál MSSI, Florencio Pina Dias Gonzaga, afirma katak instituisaun ne’e iha responsabilidade importante atu proteje labarik sira ne’ebé enfrenta situasaun risku no perigu.

Nia hatete katak, migrasaun inan-aman nian ba servisu iha rai li’ur bele afeta kondisaun psikolojia no dezenvolvimentu labarik sira ne’ebé hela iha rai.

“Psikolojikamente, labarik sira sempre hetan impaktu husi situasaun bainhira inan-aman sai ba servisu iha rai li’ur,” Florencio dehan.

Nia esplika katak, MSSI liuhusi tékniku no asistente sosiál iha munisípiu to’o postu administrativu, kontinua fó apoiu ba família sira.

Apoiu ne’e inklui prevensaun, akompañamentu no orientasaun ba inan-aman atu fahe tempu ho labarik sira, maski tenke servisu iha rai li’ur.

Florencio mós hatete katak, formasaun ne’e foka ba munisípiu Bobonaro no Covalima, antes haluan informasaun ba instituisaun iha munisípiu hotu.

Nia konsidera katak, koordenasaun entre instituisaun governamentál, família no sosiedade sivíl importante atu prevene situasaun abandonu no esplorasaun labarik.

Iha parte seluk, reprezentante UNICEF, Geovania Patricia, agradese INDDICA tanba lidera organizasaun formasaun ne’e, iha kolaborasaun ho MSSI no Departamentu Imigrasaun.

Nia hatete katak, migrasaun interna no transfronteirisa iha rejiaun ASEAN afeta vida ema barak, inklui labarik sira.

“Direitu labarik hotu tenke respeita, promove no proteje, la haree ba sira-nia estatutu migrasaun,” reprezentante UNICEF afirma.

Geovania esplika katak, programa formasaun ne’e responde ba lakuna kapasidade ne’ebé identifika ona durante autoavaliasaun Timor-Leste iha Outubru 2025.

Programa ne’e bazeia ba prinsípiu Konvensaun Direitu Labarik nian, ho objetivu atu hametin kapasidade no koordenasaun asistente sosiál sira.

UNICEF kontinua apoia governu atu dezenvolve lei, polítika no servisu ne’ebé responde ba nesesidade labarik migrante no labarik ne’ebé hela separadu husi família.

Formasaun ne’e sai parte ida husi esforsu nasionál atu garante labarik hotu moris iha ambiente seguru, hetan edukasaun no kuidadu ne’ebé adekuadu.

(dom)

Share it :

Leave a Reply

Your email address will not be published. Required fields are marked *