DILI, STLTIMORLESTE.com – Primeiru-Ministru (PM), Kay Rala Xanana Gusmão afirma katak, independénsia Timor-Leste la’ós rezultadu husi sakrifísiu mane sira de’it, maibé mós husi korajen no kontribuisaun feto Timoroan sira.
Xanana hato’o mensajen ne’e iha selebrasaun Loron Feto, iha CCD Merkadu Lama, Sesta-feira (06/11/2026), no destaca kontribuisaun feto sira iha luta libertasaun nasionál.
Nia temi eroína, saudoza Maria Tapó, ne’ebé tuir testemuña istórika, mate iha luta iha 3 Novembru 1975. Nia sai símbolu korajen no kompromisu ba liberdade Timor-Leste.
Primeiru-Ministru afirma katak, feto barak iha aldeia, suku no área foho mós kontribui iha luta, maski sira-nia istória seidauk rejista kompletu iha istória ofisiál.
“Independénsia Timor-Leste la hetan de’it husi sakrifísiu mane sira, maibé mós husi korajen, kontribuisaun no sakrifísiu feto Timoroan sira,” dehan Xanana Gusmão.
Nia subliña katak, Estadu iha obrigasaun atu rejista istória feto eroína sira, valoriza sira-nia kontribuisaun no transmite sira-nia ezemplu ba jerasaun foun.
Xanana hatete katak, obrigasaun Estadu nian la’ós de’it fó omenajen ba eroína sira ne’ebé mate ona, maibé mós garante katak feto sira ne’ebé moris ohin loron hetan direitu, oportunidade, seguransa no dignidade hanesan.
Nia hatutan katak, depois restaurasaun ukun-rasik-an iha 2002, feto Timoroan kontinua hala’o knaar importante iha konstrusaun Estadu no dezenvolvimentu nasionál.
Ohin loron, feto sira hala’o knaar hanesan membru Governu, deputada, juíza, diplomata, professora, doutora, polísia, militar, empreendedora, enjiñeira, agrikultora no líder komunitária.
Maski nune’e, Xanana rekoñese katak progresu ne’ebé atinje seidauk sufisiente, tanba feto sira, liuliu iha área rurál, kontinua enfrenta limitasaun iha asesu ba edukasaun, saúde, rai, kréditu no oportunidade ekonómika.
Iha parte seluk, Prezidente Parlamentu Nasionál, Maria Fernanda Lay, hatete katak depois independénsia, feto Timoroan kontinua desempenha knaar importante iha konstrusaun Estadu demokrátiku no dezenvolvimentu nasionál.
Nia afirma katak, ohin loron feto sira asume responsabilidade importante iha Parlamentu Nasionál, Governu, instituisaun judisiária, administrasaun públika, forsa seguransa, saúde, ekonomia no sosiedade sivíl.
Maria Fernanda konsidera katak, Timor-Leste tenke orgullu ho progresu ne’ebé atinje ona, maibé presiza kontinua promove igualdade iha área hotu-hotu.
“Ohin loron, ita bele haree feto sira asume responsabilidade importante iha instituisaun Estadu no sosiedade. Maibé ita tenke rekoñese katak reprezentasaun polítika de’it seidauk sufisiente atu garante igualdade,” dehan nia.
Nia esplika katak, igualdade la’ós de’it haree númeru feto ne’ebé okupa kadeira iha Parlamentu Nasionál, Governu ka pozisaun lideransa.
Igualdade mós signifika katak feto iha área rurál tenke hetan asesu ba edukasaun ho kualidade, servisu saúde, oportunidade ekonómika no direitu atu foti desizaun kona-ba sira-nia moris.
(eme)
