DILI, STLTIMORLESTE.com – Relasiona ho informasaun balu neebe espalha katak, Organizasaun Igreja Katolika Karismatiku Timor Leste (ICCTL) hetan lisensa ona tanba faz parte ba iha Organizasaun Comunidade Intelektual Timor Oriental (OCITO), mak husi parte Diresaun Jeral Servisu Rejistu Notariadu (DJSRN) notifika Sekretariu Jetal OCITO atu fo justifikasaun.
“Bolu atu mai halo deklarasaun kona-ba ezistensia ami nia organizasaun OCITO, no durante estabelese seidauk iha atividade ruma ami halao, no hetan legalidade husi Ministeriu Justisa ami seidauk organiza malu atu halao atividade ruma,” dehan Sekretariu Jeral OCITO, Livio da Conceição Marcos ba jornalista sira iha Notariadu, Kuarta (11/06/2025).
Hatan kona-ba ICCTL lori fali organizasaun OCITO neebe legal iha Ministeriu Justisa hodi halao atividade relijiozu nia dehan, sira nia organizasaun nee independente, husi rezistensia too mai agora iha hanoin atu kontribui ba dezenvolvimentu povu ida nee.
Esplika, sira nia misaun no vizaun mak haree ba dezenvolvimentu rai ida nee, atu politikamente ekonomikamente tenke independente, no sira iha atividade karik sei haree liu ba dezenvolvimentu rai ida nee ho nia independensia total.
Reforsa, tau naran ba organizasaun ho naran ida nee, tanba hakarak hakuak intelektual tomak.
Iha fatin hanesan, Diretor Jeral Servisu Rejistu Notariadu, Agustinho Gonsalves Viera dehan, bolu OCITO tanba razaun ICCTL halo deklarasaun katak, sira hetan lisensa ona, tanba faz parte ba iha OCITO, neebe antes nee hetan ona lisensa.
“Razaun tanba ICCTL halo deklarasaun katak, sira iha lisensa tiha ona no faz parte husi ramo OCITO, tanba nee ami halo notifikasaun bolu reprezentante Sekretariu Jeral OCITO nian atu mai fo klarifikasaun los duni ka lae, ICCTL nee faz parte OCITO duni ka lae nia dehan lalos, no saida mak Manuel halo nee bosok lalos, sira sei halo reuniaun hodi hasai Manuel husi OCITO,” dehan Viera.
Nia hatutan, notifika Sekretariu nee iha loron Segunda, ho nia razaun mak atu mai halo justifikasaun, los duni ka lae ICCTL nee faz parte iha OCITO ka lae.
Esplika tan, OCITO lisensa ona iha Notariadu, maibe ICCTL lori fali lisensa OCITO nian hatudu fali dehan sira iha lisensa ona, mak bolu fali OCITO hodi halo justifikasaun. No iha justifikasaun nee Sekretariu Jeral informa katak, sira nia organizasaun la hola parte iha ICCTL, maibe Manuel hanesan mos fundador iha OCITO no nia mak lori fali ICCTL nia naran tama iha OCITO.
Reforsa, tuir regra se iha indisus ba neeba mak sei suspende organizasaun nee nia atividade, tanba sira halo lisensa nee viola karik ita tenke suspende.
No sira nia atividade neebe hetan ona lisensa mak atu fo formasaun ba kursu sira, maibe too agora sira seidauk halao atividade ruma.
(ter)
