INFPM Responde Falta Ekipamentu Banco de Sangue

Diretor Servisu Apoiu Diagnostiku no Terapeutiku iha Hospital Nasional Guido Valadares (HNGV), Vidal Lopes. (Foto: STL/Jeniche da Costa)

DÍLI, STLTIMORLESTE.com – Institutu Nasionál Farmásia no Produtu Médiku (INFPM) responde ona nesesidade urjente ba Blood Bag no ekipamentu armazenamentu ran iha HNGV.

Diretór Apoiu Servisu Diagnóstiku no Terapéutiku HNGV, Vidal de Jesus Lopes hatete katak, iha fulan kotuk, instituisaun enfrenta problema falta Blood Bag no plástiku ran.

Maski hasoru limitasaun, Banco de Sangue kontinua buka solusaun atu garante atendimentu ba pasiente sira ne’ebé presiza transfusaun ran.

Nia esplika katak, demanda ran aas, tanba instituisaun oioin, inklui PNTL, organizasaun relijioza no universidade, husu apoiu doasaun ran.

“INFPM responde ona nesesidade urjente balun, maibé atu garante servisu iha tempu naruk, fornese kontinua nafatin presiza,” dehan Vidal ba jornalista iha HNGV Bidau, Tersa (17/11/2026).

Nia afirma katak, fornese Blood Bag la’ós nesesidade ba emerjénsia de’it, maibé importante atu garante kontinuidade servisu Banco de Sangue.

Vidal hatutan katak, ran ne’ebé rekolla tenke liu prosesu análize no teste saúde antes fó ba pasiente sira.

Ran ne’ebé hetan indikasaun moras la bele utiliza, tanba tenke garante seguransa ba pasiente ne’ebé simu transfusaun.

Antes ne’e, Diretora Ezekutiva INFPM, Paulina Mendonça Maher, informa katak kontentór rua ho medikamentu hahú to’o ona.

Nia mós hatete katak, konsumível no reagente sira tama ona, maibé sei hein prosesu alfandegamentu.

“Ba ai-moruk, kontentór rua hahú tama ona. Konsumível no reagente sira tama hotu no hein prosesu alfandegamentu,” dehan Paulina.

Paulina informa katak, kontentór haat seluk sei to’o iha 16 Novembru 2026, liuhusi Aeroportu no Portu Tibar.

Fornecimento ne’e atu responde preokupasaun HNGV, Laboratóriu Nasionál, Banco de Sangue, sentru saúde no postu saúde sira.

INFPM kontinua buka solusaun atu rezolve falta ekipamentu no konsumível médiku, inklui aproveita stok disponivel iha munisípiu balun.

(dom)

Share it :

Leave a Reply

Your email address will not be published. Required fields are marked *