DILI, STLTIMORLESTE.com – Inspetor eskolar sira nafatin halo monitoring ba atividades neebe mak lao iha eskola sira, inklui programa merenda eskolar.
Haktuir Diretor Servisu Edukasaun Munisípiu Likisa, Julio da Silva ba jornalista STL liu husi telefone, Segunda nee (06/04/2026).
“Durante nee ita nian inspetor eskolar sira nafatin halo monitoring ba ita nian atividades neebe mak lao iha eskola sira, tanba inspetor sira nee balun halo monitoring ba iha ensinu pre eskolar, ensinu baziku, tekvo no ensinu sekundariu, sira idak-idak halao servisu tuir nivel ensinu neebe mak mensiona,” dehan nia.
Julio dehan, inspetor sira monitoring ba eskola sira nee hanesan monitoring ba atividades prosesu aprendizajen, implementasaun programa merenda eskolar nomos atividades hotu neebe mak lao iha eskola sira.
Iha parte seluk, Superintendente Edukasaun Munisípiu Dili, Cesarina C. Guterres hatete, inspetor eskolar sira nee halo monitoring ba eskola sira, monitoring ba atividades hirak neebe mak lao iha eskola sira.
“Hau hanoin ita nian inspetor eskolar sira nee mak halo monitoring ba ita nian eskola sira, tanba sira monitoring ba prosesu aprendizajen, merenda eskolar, nunee mos atividades seluk neebe lao iha ita nian eskola idak-idak,” nia informa.
Entretantu Carlos Correia hanesan Diretor EBC Manleuana hatete, inspetor eskolar sira nee mai iha sira nian eskola haree merenda eskolar nee lao tuir menu neebe mak iha ka lae, nomos monitoring ba aprendizajen iha eskola.
“Hau hanoin ita nian inspetor eskolar sira nee mai iha sira nian eskola, haree merenda eskolar nee lao tuir menu neebe mak iha ka lae nomos monitoring ba aprendizajen iha eskola,” katak nia.
(jac)
