DILI, STLTIMORLESTE.com -Inspetores sira iha Edukasaun Munisípiu Dili nafatin halo monitoring ba programa merenda eskolar, no fornesedor sira tein merenda tuir menu neebe estabelese ona iha eskola idak-idak Munisipiu Dili.
Haktuir Superintendente Edukasaun Munisípiu Dili, Cesarina C. Guterres ba STL iha nia knaar fatin, Tersa nee (12/05/2026).
“Merenda eskolar lao normal, foin lao iha semana daudaun nee. Merenda lao tuir nafatin menu neebe estabelese ona iha eskola sira, ita nian inspetor kontrola tuir sira idak-idak nia area kontrolu. Inspetor ou inspetora sira nia monitorizasaun laos deit ba merenda eskolar, maibe inklui mos atividade prosesu ensinu aprendizajen iha eskola sira.
Nia akresenta, atu informa deit merenda eskola iha Eskola EBC Metinaro ho agrupamentu EBF Metinaro, Besahe, Lebutun, Benunuk no manuleu, eskola hirak nee merenda seidauk lao, tanba foin semana liu ba sira nia diretora eskola mate.
Iha fatin seluk, Koordenador Ensinu Baziku Filial (EBF) nu. 5 Komoro, Marcelino Moniz hatete, estudantes husi Ensinu Baziku Filial (EBF) nu. 5 Komoro konsumu aifuan lokal no naan karau iha programa merenda eskolar.
“Implementasaun programa merenda eskolar lao diak hanesan baibain, menu neebe mak eskola uza nee hanesan bai-bain, nee mak uza produtu lokal, hanesan Modo tahan, aifuan lokal hanesan pateka, aidila, apel, no ayam potong, sosis, ika nee la tama iha menu, tanba ami uza deit naan karau,” nia informa.
Nia afirma, nee duni semana ida nia laran sira han deit naan karau, modo tahan no produtu seluk tan, estudantes rihun rua resin mak asesu ba iha programa merenda eskolar, tanba nee kada loron estudantes sira asesu ba iha programa nee ho diak tebes no ema neebe tein ba estudantes sira nee hamutuk nain 10.
“Ami nian estudantes husi eskola ida nee fahe ba iha turnu haat, tanba nee ema neebe tein ba ita nian estudantes sira han nee nain sanolu, ho nunee tein ba estudantes dader meudia no loraik, tanba ita fahe ba iha turnu haat,” nia haktuir.
Nunee mos Diretor Eskola Baziku Central (EBC) Manleuana, Carlos Correia dehan, fornesedor sira husi eskola Baziku Central (EBC) Manleuana uza deit ai sunu hodi tein programa merenda eskolar ba estudantes sira.
“Ami nian programa merenda eskolar lao diak hela, konaba menu merenda nee ami uza nafatin menu ida tuan nee. Aifuan estudantes sira han nafatin, hanesan hudi, aidila, pateka, apel no aifuan seluk tan, nee kada loron ami nian estudantes sira sempre han, nee duni ami nian estudantes sira han hotu, sira han ho aifuan,”katak nia.
Nia hatutan, estudantes sira han naan karau, manu tolun, loron Sesta estudantes sira han fore mungu, mil novi sentus setenta dois estudantes mak asesu ba iha programa merenda eskolar iha sira nian eskola, fornesedor sira uza ai sunu mak tein hahan ba estudantes sira han, tanba nee total fornesedor iha sira nian eskola hamutuk 12 mak tein hahan ba estudantes sira.
(jac)
