DILI, STLTIMORLESTE.com – Investor foun husi PT Celebes Mineral Indo Resources aprezenta nia planu sira atu investe iha esplorasaun no prosesamentu ba mineral, neebe sei investe iha Timor Leste ba Prezidente Republika (PR), Jose Ramos Horta.
Iha hasoru malu nee, Prezidente Republika, Jose Ramos Horta manifesta ona apoiu ba potensial investimentu foun ida iha setor mineiru Timor Leste nian, hafoin enkontru ho reprezentante sira ho PT Celebes Mineral Indo Resources, subsidiariu husi Xinjiang, Xina neebe agora daudaun estabelese iha Indonezia.
Iha biban nee, Diretor PT Celebes Mineral Indo Resources, Musri Mawaleda ba jornalista sira iha Palasiu Prezidensial Nicolau Lobato, Bairo Pite, Dili, Kuarta (12/03/2025) hatete, hasoru malu Prezidente Republika, Jose Ramos Horta hodi aprezenta planu neebe atu investe iha Timor Leste ba Xefe Estadu.
“Hasoru Prezidnete aprezenta planu sira atu investe iha esplorasaun no prosesamentu ba mineral sira kobre osan-mean no manganes (marbel) nian iha Timor Leste,” katak nia.
Bainhira remata aprezenta planu, Prezidente simu ho laran haksolok proposta neebe bele hasae dezenvolvimentu ekonomiku nasaun nian.
Durante diskusaun sira, empreza Xineza nee trasa nia kompromisu atu fo prioridade ba dezenvolvimentu forsa trabalhu lokal nuudar parte ida husi sira nia estratejia investimentu.
PT Celebes Mineral Indo Resources rekonhese natureza risku aas husi emprendimentu mineiru sira no informa ba Prezidente kona-ba sira nia intensaun atu halao peskiza preliminar klean molok kontinua ho investimentu sira neebe boot liu, hodi hatudu saida mak Prezidente haree hanesan aprosimasaun ida neebe responsavel ba dezenvolvimentu rekursu sira.
Kompanhia nee hahu ona komunikasaun ho Ministeriu Petroleu no prepara hela atu hatoo pedidu formal ba lisensa tuir enkuadramentu regulatoriu Timor Leste nian.
Etapa sira tuir mai neebe propoin inklui halao levantamentu preliminar sira nee sei envolve kolaborasaun entre peritu jeolojiku lokam no internasional sira, prosesu ida neebe Prezidente indika ona katak, alina ho vizaun Governu nian ba jestaun rekursu sustentavel no investimentu estranjeiru.
(eme)
