BAUCAU, STLTIMORLESTE.com – Institutu Superior Cristal (ISC) koloka estudante estajiaru hamutuk nain 154, halao pratika klinika nesesidade baziku no espesializasaun iha Hospital Rejional Eduardo Ximenes (HoREX) Baucau.
Xefe Akademiku ISC Polo Baucau, Marçal Victor Soares aprezenta, estudante estajiariu hamutuk nain 154 neebe ISC Polo Baucau no Sentral koloka iha HoREX Baucau hodi partisipa iha estajiu pratika komunitariu baziku no espesializasaun kompostu departamentu rua mak hanesan departamentu parteira atu halao estajiu iha nivel pratika klinika nesesidade baziku nian hamutuk nain 20 no ba nivel espesializasaun nain 63. Enkuantu husi departementu enfermajen ba nivel pratika klinika nesesidade baziku nain 33 no espesializasaun nain 38.
“Ba espesializasaun sira sei pratika fulan tolu neebe mak tenke priense unidade sira iha HoREX, ba bazika nian fulan rua iha HoREX nomos Sentru Saude Tirilolo,” hateten Marçal Victor Soares ba jornalista sira hafoin remata sesaun entrega estudante estajiaru sira ba HoREX Baucau, Tersa (11/08/2026).
Nia relata, objetivu prinsipal husi estajiu pratika klinika nesesidade baziku no espesializasaun mak, atu estudante sira atu hasae sira nia koinhesementu no abilidade kona-ba, hatene kuidadu inan isin rua, prosesu partu, kuidadu post partu no planeamentu familia.
Nia komenta, estajiu refere fo oportunidade ba estudante sira atu aplika konhesimentu teoriku iha pratika, liu liu iha prestasaun kuidadu enfermajen neebe apropriadu, seguru no efetivu iha nivel Hospital Rejional Eduardo Ximenes Baucau tuir servisu neebe atribui ona.
Iha fatin hanesan, Diretor Ezekutivu HoREX Baucau, Claudino Ximenes hateten, parte HoREX sei la atribui servisu ba estudante estajiariu Pratika Klinika Baziku no Espesializasaun, tanba estudante estajiaru sira sei halao servisu iha prosesu estajiu sei atinji tarjetu neebe difini ona iha eskola tuir kompetensia area ida idak nian.
“Sira nee mai ho livru kompetensia rasik saida mak sira atu atinji. Ezemplu nesesidade baziku nee sira fo deit asistente enfermajen nian ba moras sira mak hanesan, ajuda pasiente sira atu han, hamoos pasiente sira nia nehan, hadia kama no sukar pasiente sira nia sinais vitais. Maibe sira espesializasaun nee iha ona sira nia kompetensia, bele monta soru KTTR, kanek karik sira bele suku,” Claudino informa.
Diretor nee katak, estudante estajiariu hirak nee halao servisu estajiu nian tuir deit ezame kompetensia neebe sira remata ona, tanba sira mos iha ona abilidade pratika, maibe estudante hirak nee sei la halao servisu estajiu mesak, tanba iha orientador rua kompostu orientador klinika no akademiku inklui emfremeiru no mediku sira, neebe sei akompanha prosesu tomak too remata estajiu pratika klinika nesesidade baziku no espesializasaun iha HoREX.
Claudino komenta, durante estadia estudante estajiariu sira iha HoREX laos halao deit servisu estajiu nian, maibe parte HoREX mos sei fo ezame ba sira nunee bele hatene estudante hirak nee nia kapasidade. Tanba estudante estajiaru hirak nee nuudar ema akademista, neebe prezisa apoiu husi parte hotu nunee sira sai rekursu umanu neebe diak ba povu no nasaun.
Enkuantu reprezentante estudante estajiariu 154, Deonizia Auxiliadora da Silva Freitas konsidera, prosesu estajiu mak dalan ida atu fo konhesimentu direita ba pratikante sira, maibe atu hetan rezultadu diak iha prosesu estajiu depende ba estudante ida-idak nia partisipasaun no vontade atu aprende.
“Ba hau pesoal hau prontu tebes atu tuir estajiu ida nee, tanba durante loron barak ona ami prepara iha eskola nomos ami tuir ona ezame kompetensia iha eskola mak mai tuir estajiu,” Deonizia komenta.
Entretantu seremonia koloka estudante estajiaru nain 154 iha HoREX Baucau nee, prezide direita husi magnifiku reitor ISC no Komadante Komando Polisia Munisipiu Baucau, neebe hetan partisipasaun masimu husi estrutura HoREX no ISC Sentral no Polo Baucau.
(tom)
