ISPA Maioria Iha Sentru Saude Tirilolo

Xefe Sentru Saude Tirilolo, Luiza da Costa Belo. (Foto:STL/EST 2)

BAUKAU, STLTIMORLESTE.com – Husi loron 01 too 29 Janeiru 2025, Sentru Saude Tirilolo, Munisipiu Baukau, simu pasiente hamutuk 5.607, neebe maioria afeta ba moras Infesaun Respiratoriu Aguda (ISPA).

“Fulan nee total pasiente 5.607 mak mai iha sentru saude, ita haree ba iklima moras neebe aas liu mak Infesaun Respiratoriu Aguda,” hateten Xefe Sentru Saude Tirilolo, Luiza da Costa Belo ba STL iha nia knaar fatin Tirilolo, Kinta (30/01/2025).

Luiza sublina, husi numeru 5.607 moras aas liu mak ISPA neebe rejistu 897, diare 157, isin kulit katar 33, enkuantu seluk mak rejistu inan isin gravida sira neebe halo konsulta no partus inklui bebe no labarik sira neebe simu imunizasaun.

Nia fundamenta, tipu moras hanesan ISPA, diare no isin kulit katar, afeta ba pasiente sira hahu husi labarik idade kiik too ema idozu ho kauza neebe hanesan, tanba deskonfia kauza husi mudansa klimatika no konsumu hahan no bee hemu neebe la ijiene, maibe la rejistu pasiente grave no mate.

“Daudaun ami nia atendimentu ba pasiente sira kona-ba aimoruk sufisiente hela, tanba ami iha pedidu semanal ou emerjensia nian, neebe bainhira stock laiha pedidu ba kedas Farmasia,” Luiza akresenta.

Xefe Sentru Saude nee argumenta, durante rejistu sira laiha pasiente ida afeta ba moras grave, tanba stok aimoruk iha armajen garante atu oferese ba pasiente sira hodi konsumu kurativu moras neebe enfrenta.

(EST 2)

Share it :

Leave a Reply

Your email address will not be published. Required fields are marked *