DILI, STLTIMORLESTE.com – Sentru Saude Ermera iha Janeiru too Marsu tinan nee rejistu moras tuberkuloze (TBC) hamutuk 61, husi numeru nee pasiente nain 2 mate.
Diretor Sentru Saude Ermera, Antonio de Deus Fatima hatete, dadus moras tuberculoze neebe mak sentru saude nee rejistu iha 2026 hahu husi Janeiru too Marsu hamutuk pasiente 61. Husi 61 nee Mane hamutuk 38 no feto 23, no pasiente nain 2 mate. Agora dadaun hela deit nain 59 mak halo hela tratamentu iha Postu Saude sira iha Ermera nian.
Nia katak, ema neebe afeita ba moras tuberculoze nee hahu husi tinan 0 too 24 nain 14, idade 25 too 54 nain 22 no 55 bá leten nain 25.
“Husi pasiente 61 nee rejistu barak liu mak iha Sentru Saude Gleno hamutuk 21 neebe nain 2 mate no agora hela ita nia pasiente nain 19 mak halo hela tratamentu iha nee. Tuir fali mak Postu Administrativu Railaco neebe rejistu pasiente TBC hamutuk nain 12, no agora sira mos halo hela tratamentu saude iha Postu Saude Railaco nian,” dehan nia bá STL liu husi telefone iha Ermera, Tersa (22/04/2026).
Nia hatete, nunee mos bá pasiente sira husi Postu Administrativu seluk mos halo tratamentu saude bá iha Postu Saude neebe besik iha sira nia hela fatin.
Programa tratamentu saude bá moras tuberculoze nee durante fulan 6 nia laran, pasiente sira lor loron tenke mai foti aimoruk iha sentru saude hodi hemu. Bá sira neebe hela besik iha sentru saude lor-loron mai foti aimoruk, sira neebe hela dok semana ida mai foti dala ida. Reprejenta husi membru familia ida mai, hodi entrega aimoruk nee fo bá pasiente hemu.
Nia hatutan, moras tuberculoze nee laos haree bá klima mak mosu hanesan dengue ka malaria, maibe haree husi faktores barak hanesan ekonomia familia, hela fatin, laiha konsiensia rasik husi komunidade no laiha konesementu. Komunidade balun mear no senti hetan ona moras nee maibe lakohi mai halo scan iha sentru saude hodi deteta sira nia moras. Iha Munísipiu Ermera ho numeru populasaun neebe barak, bainhira komunidade ida hetan moras nee lakohi mai halo tratamentu, entaun fasil atu daet fali ba membru familia sira seluk. Tanba nee medidas prevensaun neebe Servisu Munisipiu Saude halo liu husi ekipa Edukasaun Promosaun Saúde (EPS), sempre halo promosaun saude bá komunidade sira iha Sentru Saude sira. Ekipa mos halo sosializasaun bá iha eskola no autoridade lokal sira dala ida iha kada fulan. Nunee mos Postu Administrador sira vokal point sira sempre halo promosaun saude iha Postu Saude, sosializasaun ba iha eskola no autoridade lokal sira.
(dom)
