DILI, STLTIMORLESTE.com – Embaixada Japaun iha Timor Leste, Tetsuya Kimura konsidera, investimentu no dezenvolve ba reziliensia rural nuudar xave ba Estadu Timor Leste (TL).
“Hau haksolok tebes atu atende ba projetu Setor reziliensia rural no hadia meius subsistensia, tanba nee hau nia agradesimentu ba kooperasaun besik ho Governu, ADB no parseiru sira seluk no lideransa neebe forte iha Timor Leste,” dehan Embaixador Japaun iha Timor Leste, Tetsuya liu husi nia diskursu iha Ministeriu Finansas (MF) Dili, Kuarta (18/12/2024).
Nia dehan, Japaun haree dezenvolvimentu rural hanesan xave ida iha estratejia asistensia ba dezenvolvimentu iha Timor Leste, tanba tinan hirak nia laran Japaun implementa ona projetu lubuk ida inklui dezenvolvimentu infraestrutura bazika, servisu sosial, hasae meius subsistensia.
Tanba nee, Japaun konsidera investimentu no dezenvolve setor produtivu, liu-liu hadia reziliensia rural, nee nuudar save iha ba estadu no povu Timor Leste, nunee Japaun mai ho objetivu ida oinsa atu foku makaas ba apoiu komunidade lokal sira.
Iha sorin seluk, Ministra Finansas (MF), Sara Lobo Brites dehan, apoiu neebe ADB ho parseiru estratejia dezenvolvimentu sira fo ba Estadu Timor Leste ho montante boot, neebe sei hadia reziliensia rural iha Munisipiu Manatutu, liu-liu ba setor agrikultura nian.
Tanba introdusaun pratika agrikultura inovativu, diversifikasaun atividade agrikola, nee oinsa bele hametin kadeias valor ba produtus agrikola, inklui hadia estrada komunidade rural sira, atu moris ho kondisaun neebe seguru no akutavel.
Governu Japaun mos halo projetu xave lubuk ida, inklui reabilitasaun no hadia eskema Irigasaun Buluto, nee investimentu prinsipal setar privadu Japaun nian, planeia ona iha area sira hanesan konstrusaun roo no konstrusaun sentral eletrika solar, signifika atu dezenvolve no hasae empregu nian no hasae moris diak komunidade lokal sira nian.
Entretantu Visi Primeiru Ministru, Mariano Assanami Sabino hatete, agradese ba Embaixada Japaun neebe durante nee fo apoiu makaas ba Timor Leste, liu-liu atu halo dezenvolvimentu ba setor agrikultura iha Manatutu, sai modelu dezenvolvimentu rural nasaun nian.
(ter)
