DILI, STLTIMORLESTE.com – Embaixador Japaun ba Timor Leste, YAMAMOTO Yasushi hatoo parabéns ba destinatáriu bolseiru nain 20 ba tinan 2026, neebé maka hili liuhosi prosesu selesaun ida neebé rigorozu.
“Hau fiar katak estudante promisór sira-nee sei aproveita diak liután bolsa-estudu nee hodi estuda ho esforsu boot liután no kontribui ba harii futuru ida-neebé diak liután ba Timor-Leste. Hau nia parabéns mós ba sira-nia família no profesór sira neebé durante nee fó apoiu ba sira durante prosesu selesaun,” dehan Embaixador YAMAMOTO Yasushi wanhira hatoo nia diskursu iha sermonia Prémiu Bolsa Estudu Interkámbiu Kulturál Internasionál Fundasaun Osaka Gas nian tinan 2026 neebe realiza iha Embaixada Japaun, Pantai Kelapa, Dili, Tersa (21/4/2026).
Tuir informasaun neebe nia hetan katak dezde inisiasaun bolsu estudu nee iha tinan 2012, too agora, estudante enjeñaria Universidade Nasional Timor Lorosae (UNTL) hamutuk 340 mak hetan ona bolsu estudu nee husi OGFICE. Aumenta tan tinan ida-nee ba estudante lisensiatura nain 14 no bolseiru pós-graduadu nain 6 sei lori númeru totál ba 360.
“Hau aproveita oportunidade ida-nee atu espresa hau nia apresiasaun sinseru ba OGFICE ba sira nia apoiu jenerozu, no ami hein ba asisténsia kontinua iha tinan sira tuirmai,” katak Embaixador Yasushi.
Nia haktuir tan katak hanesan parte ida husi kooperasaun iha dezenvolvimentu rekursu umanu iha Timor-Leste, Governu Japaun fó ona asisténsia ba Fakuldade Enjeñaria UNTL nian dezde tinan 2001 liuhosi JICA. Edifísiu ida-nee, neebé remata iha Janeiru 2020, mós parte ida hosi kontribuisaun Japaun nian, oferese ambiente ida neebé diak liu ba estudante sira atu konsentra liután iha sira nia estudu.
“Hau mós hakarak temi katak iha tinan kotuk iha fulan Maiu, kursu lian Japaun hahú fali iha Fakuldade Siénsia Sosiál UNTL, no estudante nain sia kompleta ona ho susesu sira-nia kursu oras 240 neebé halao durante fulan neen. Hau hatoo hau-nia agradesimentu ba membru hotu-hotu UNTL nian ba parseria tinan naruk ho Japaun no ami hein atu iha kolaborasaun liután,” nia tenik.
Embaixador Yasushi mos dehan, Japaun nia asisténsia iha kapasitasaun povu timoroan nian, liuliu ba jerasaun tuirmai, sai nuudar sira nia prioridade prinsipál ida. Timor Leste oras nee ofisialmente nuudar membru ASEAN ba dala 11 no hakat ba kapítulu tuir mai kona-ba konstrusaun nasaun nian.
“Japaun nia asisténsia inklui bolsa estudu nee laós deit ajuda finanseira; nee hanesan investimentu ida iha ita-boot sira-nia potensiál atu haburas kreximentu pesoál nunee mós atu kontribui ba futuru nasaun doben ida-nee, Timor-Leste. Hau dezeja buat diak hotu ba ita-boot iha ita-boot nia esforsu sira iha futuru,” nia konklui.
(mik)
