DILI, STLTIMORLESTE.com – Governu liu husi Jestaun Merkadu Munisipiu Dili sei servisu tuir Dekretu Lei Nú. 33/2018 loron 27 Agostu, kona-ba ijiene no orden publika, bandu vendedór ambulante halo negósiu iha espasu publiku, tanba nee sei lá tolera negosiante sira faan iha dalan ibun.
“Ba oin ita sei la tolera ba negosiante sira neebe faan iha dalan publiku,” hatete Xefe Departamentu Jestaun Merkadu Munisipiu Dili, Joaqmin Alves B. M Belo ba jornalista sira iha Eskuarda PNTL Dom Alexo Aimutin, Sesta (10/1/2024).
Nia dehan, tanba loron boot natal no tinan foun, Jestaun Merkadu Munisipiu Dili la servisu, maibe agora tama ona fulan Janeiru tinan 2025 sei kontinua kontrola negosiante sira neebe faan iha espasu publiku.
“Ita hanesan ema humanu preparasaun ba simu santu Natal no tinan foun, neebe tama ona ba 2025 nee ba oin ami sei la tolera negosiante sira neebe kontinua faan iha espasu publiku,” nia esplika.
Nia deklara, Jestaun Merkadu Munisipiu Dili halao kontrolu uza fuan, maibe avizu beibeik katak, sei kontinua faan iha dalan ninin no trotoar leten sira sei la tolera, tanba hakarak sidade Dili sai furak iha ema hotu nia matan.
Iha fatin ketak, negosiante dalan ninin, Veronica da Costa deklara, sira sei kontinua faan iha espasu publiku, tanba kondisaun ba sira laiha, merkadu rua negosiante sira nakonu.
“Ami la faan iha dalan ninin ba faan iha neebe loos, tanba ita haree merkadu Manleuna no Taibesi negosiante nakonu, espasu la iha, nebee atu bandu mos ami kontinua faan iha nee, tanna liu husi ida nee mak ami hetan osan hodi selu oan sira nia eskola no nesesidade uma laran nian,” nia afirma.
(jen)
