DILI, STLTIMORLESTE.com – Jesus dehan ema idak-idak iha responsabilidade ba moris tuir espiritual no moral neebe Jesus hanorin, tanba nee haree maluk seluk lao sala dalan buka fo honoin dada ba dalan los.
Lia hirak nee hatoo husi Padre Paul Kerans SVD ba STL, Kuarta (12/08/2026) hatete, iha evanjelhu ohin Jesus hanorin ema oinsa responsabilidade ba nia aan, no moris tuir buat neebe Nai Maromak haraik ona.
Evanjelhu foti husi Mateus 18:15-20, Jesus nia mensajen iha Evanjelhu ohin nian katak iha komunidade ninia disípulu sira nia laran, sei la iha duvida katak sei iha sira neebe lao sala dalan. Jesus hatene didiak katak igreja neebe nia harii laos komunidade ema perfeitu nian. Ida nee maka komunidade ida husi ema sala nain sira neebe hakaas aan atu sai diak liu tan.
Nunee, Jesus sujere prosedimentu ida atu ajuda ema seluk neebe halo sala atu fila fali ba dalan loos. Ema neebe sai vítima ba erru nee tenke koalia ho ema neebe responsavel ba erru nee. Se ida nee la funsiona, tenke lori ema ida ka rua seluk atu koalia ho ofendor. Se ida nee la funsiona, komunidade sarani tomak tenke envolve.
Entaun, prosedimentu neebe Jesus sujere karik la aplika iha situasaun hotu hotu no idade hotu-hotu. Maibe, prinsípiu baziku nafatin loos.
“Jesus hatete katak ita iha responsabilidade ba ida idak nia moris diak. No ida nee inklui laos deit moris diak fíziku maibe mos moris diak espiritual no moral. Nia hein ita atu ajuda malu ba buat diak. Ita iha papel atu ajuda malu atu haburas iha domin hanesan Jesus. No ida nee la dehan katak ita balu iha moral no espiritual neebe diak liu fali ema seluk,” dehan Padre.
Bibi atan kreda katolika nee haktuir tan katak ema hotu hotu moris lases husi sala, maibe bainhira lao sala dalan buka hadia aan ho perdua lao tuir fali dalan neebe mak los.
“Ita hotu ema sala nain, no ita ida idak presiza membru sira seluk husi komunidade sarani sira nian atu tulun ita iha ita nia viajen ba Maromak. Bainhira ita halibur hamutuk atu tulun malu, Jesus promete mai ita katak Nia sei hamutuk ho ita. Ita la mesak. Iha neebe ema nain rua ka tolu halibur hamutuk hodi Hau nia naran, Hau sei iha neeba,” dehan nia.
Nunee mos Padre Rakardus Pasang SVD hatutan, evanjelhu ohin foti husi (Ezek 9:1-7; 10:18-22 & Mt 18:15-20).
“Hasee ho lian domin. Gloria ita boot nian dala ida sai ona husi templu, tanba ami nia fuan nakonu ho rai rahun no bosok. Marka ami nia rentos ho matan ben arrependimentu nian, atu nunee ami labele mate iha nonok sala nian. Hanorin ami atu hasee, laos atu julga, buka fali neebe lakon, laos atu soe. Iha fatin kiik entre fuan rua tolu neebe reza, ita prezente, no kanek sira diak fila fali,” dehan Padre.
Iha biban nee Padre harohan ba Maromak atu haraik bensaun nunee ema hotu bele lao tuir dalan neebe Jesus hanorin no labele husik dalan neebe mamuk.
“Labele husik ami sai uma mamuk, halo ami sai templu neebe sempre temi ita nia naran iha neeba ita boot hela, iha neeba domin nunka menus no maran,” hakotu.
(eme)
