DILI, STLTIMORLESTE.com – Jesus nunka husik nia ema sira mesak bainhira hasoru dezafiu oin oin iha nia moris, tanba nee nafatin tau fiar iha Nia.
Lia hirak nee hatoo husi Padre Paul Kerans, SVD ba STL liu husi refleksaun ba loron Segunda 27/04/2026 reflesaun ba Segunda feira, semana haat paska nian, 27/4/2026 Joao 10:11-18.
“Iha Evanjelhu ohin nian, bainhira Jesus bolu nia aaan nuudar Bibi-Atan Diak, nia la uza deit metafora ida neebe fo kmaan. Nia identifika nia-aan ho papel antigu nuudar bibi-atan, ida neebe moris iha bibi-lubun nia leet, hodi defende sira husi perigu, no hatene bibi ida-idak nia naran. Bibi-atan diak la halai bainhira asu-fuik mosu. Nia la abandona ema neebe fraku ka ema neebe lakon. Envezde, nia risku buat hotu ba sira nia seguransa. Ida-nee maka tipu kuidadu neebe Jesus oferese mai ita, no ida-nee mos tipu kuidadu neebe nia bolu ita atu oferese ba ema seluk,” dehan Padre Kerans.
Padre hatutan tan katak Iha versíkulu 12, ema hetan komparasaun entre bibi-atan diak no serbisu-nain neebe kontratadu. Serbisu-nain neebe kontratadu halai bainhira susar mosu tanba nia la tau matan duni ba ninia bibi sira.
“Kontraste ida-nee obriga ita atu husu Ita iha kompromisu ba ema seluk bainhira deit buat sira fasil, ka ita prontu atu hamriik iha sira nia sorin bainhira moris sai susar? Domin lolos hatudu laos iha tempu konfortu nian, maibe iha tempu krize nian,” katak Padre.
Bibi atan kreda katolika nee dehan husi liafuan nee fo hanoin ba ema hotu katak Jesus nunka husik nia ema bainhira hasoru dezafiu no monu ba susar nia sempre hamutuk.
“Jesus nia liafuan nee fo hanoin mai ita katak ita la mesak. Ami konesidu tebes no hadomi ami ho ami nia fuan tomak. Hau hatene hau nia bibi sira, no hau nia bibi sira hatene hau. Konesimentu neebe klean nee mak hun ba ita-nia fiar. Laiha ema ida maka haluha. Laiha ema ida maka la haree. La importa ita lao dook too iha neebe, Bibi-Atan Diak hatene ita nia naran no buka ita nia fuan. Iha Nia, ita sei la lakon,” katak Padre.
Padre haktuir tan katak hodi hakuak papel bibi-atan diak nian, hetan konvite atu lidera ho aten-brani, domin inkondisionalmente, no buka nafatin sira neebe lakon no sira neebe kiik liu.
“Hanesan Jesus, ita-nia bibi-atan diak, mai ita-nia moris reflete legadu ida kuidadu nian, sakrifísiu nian, no domin neebe laiha limite,” hakotu.
(eme)
