João Troka Antonio de Sa Lidera Komando Polisia Baukau

Superintendente Xefe Polisia, João Sanco Pires. (Foto: STL/EST 2)

BAUKAU, STLTIMORLESTE.com – Superintendente João Sanco Pires troka Superintendente Xefe Polisia, Antonio Maria de Sa, hodi lidera Komando Polisia Munisipiu Baukau.

Desizaun subtituisaun kargu Komandante Polisia Baukau nee bazeia ba despaisu husi Komando Jeral Polisia Nasional Timor Leste numeru 169/CG/PNTL/I/2025, loron 11 Janeiru, kona-ba nomeasaun Komandante Polisia interinu Munisipiu Baukau.

Komandante foun interinu nee hateten, sei konsolida hamutuk ho Xefi Seksaun sira no laiha planu foun atu halo, maibe sei kontinua deit planu servisu neebe trasa ona husi komandante sesante, tanba iha programa barak neebe seidauk atinje.

“Komandante foun kontinua hela saida mak iha hela Baukau, bele asegura hela planu Governu neebe Autoridade Munisipiu halo hela, karik PNTL kontinua apoiu,” hatete Superintendente João Sanco Pires ba jornalista sira, hafoin remata serimonia entrega servisu iha edifisiu Komando Polisia, Baukau, Segunda (20/01/2025).

Komadante foun nee sublina, planu apoiu ba servisu Autoridade Munisipal neebe implementa hela programa Governu iha Baukau, Komando Polisia Baukau sei la mesak, tanba sei apoiu husi FALINTIL-Forsa Defeza Timor Leste (F-FDTL).

Maibe dahuluk sei halo vizita Autoridade sira iha Baukau, mak hanesan Prezidente Autoridade Munisipiu Baukau, Bispu Dioseze Baukau, Komandante Eskuadra, Autoridade Postu Administrativu inklui Xefi Suku sira tuir kada suku hodi koalia kona-ba asuntu seguransa iha Baukau.

Enkuantu Komandante sesante, Superintendente Xefi Polisia Antonio Maria de Sa liu husi diskursu, agradese ba parte Komandante Seksaun, Eskuadra no membru sira tomak neebe durante servisu ho dedikasaun garante situasaun pas hakmatek ba selebrasaun eventu importante sira iha Baukau.

Nunee mos agradese ba Autoridade Lokal, Veteranu, joven sira inklui entidades seluk neebe durante kontribui ona parte seguransa hodi realiza serimonia importante sira ho hakmatek.

(EST 2)

Share it :

Leave a Reply

Your email address will not be published. Required fields are marked *