DILI, STLTIMORLESTE.com – Tribunal Judisial Primeira Instansia Dili (TJPID) iha loron Kinta nee (16/07/2026), liu husi despaisu ba prosesu primeiru interogatoriu deside aplika medida ba arguidu nain 14, neebe polisia detein iha area Kampu Baru, Munisipiu Dili.
Medida neebe iha mak hanesan medida Aprezentasaun Periodika no medida kausaun kada arguidu US$ 2500, medida Probeisaun de Auzensia, no mantein ho medida Termo Indentidada Rezidensia (TIR) neebe antes nee iha ona.
Prosesu nee lori ba iha Tribunal, rejista ho numeru NUC 0247/26.PNSIK. No Ministeriu Publiku halo promosaun ba arguidu nain 14, ho krime haat (4) mak hanesan Krime Jogu ilisitu, Asosiasaun Kriminoza, Burla informatika no krime Brankamentu kapitais, tanba deskonfia envolve iha jogu online Scamming Call Centre.
Antes nee, iha alegasaun Ministeriu Publiku reprezenta husi Prokurador João Marques, husu Tribunal atu aplika medida Proibisaun Auzensia, medida Aprezentasaun Periodika ba arguidu JM no RM, no medida Kausaun ho osan US$ 3000 ba kada arguidu.
Enkuantu husi parte defeza la aseita alegasaun Ministeriu Publiku nia neebe mak husu Tribunal atu aplika Kauasaun kada arguidu US$ 3000, tanba medida kausaun nee valor boot liu, nunee husu Tribunal tenke reduz medida kausaun, tanba haree ba arguidu sira nia kondisaun ekonomia.
Rekorda katak, arguidu nain 14 nee, polisia detein iha Kampung Baru. Durante operasaun, ekipa identifika grupu boot nee utiliza teknolojia avansada hodi halo operasaun iha kapital Dili. Ekipa mos prende sira nia pasaporte iha Kampung Baru hamutuk 14, telemovel no osan balun.
Prosesu Primeiru Interogatoriu nee prezide husi Juiz estajiadu Marculino dos Santos Oliveira, Ministeriu Publiku reprezenta husi Prourador João Marquez, arguidu nain 14 hetan asistensia legal husi Advogadu Privadu, Octavio Cardozo.
(ter)
