DILI, STLTIMORLESTE.com – Tribunal Judisial Primeira Instansia Dili (TJPID) iha loron Kuarta nee (22/07/2026) liu husi despaisu ikus ba kazu Jogu Online Scamming Call Centre iha Kuluhun California, deside aplika medida ba arguidu nain 19 neebe autoridade seguransa detein.
Arguidu nain 19 nee husi Ministeriu Publiku neebe reprezenta husi Prokurador Rafael Gusmão promove sira ho krime Jogu Ilisitu previstu iha artigu 322, Asosiasaun Kriminoza previstu iha artigu 188, Brankamentus Kapitais previstu iha artigu 313, no Burla Informatika previstu iha artigu 268 husi Kodigu Penal Timor Leste nian.
Rona tiha arguidu sira, iha despaisu Tribunal deside ba arguidu nain 18 aplika medida kausaun kada arguidu US$ 4000, Medida Proibisaun Auzensia no kontinua mantein ho medida Termo Indentidade Rezidensia (TIR) neebe antes nee iha ona.
Ba arguidu nain 1 Tribunal aplika medida kausaun US$ 5000, no medida Aprezentasaun Periodika semana ida dala rua no kontinua mantein ho medida Termo Indentidade Rezidensia (TIR), neebe antes nee iha ona.
Prosesu nee prezide husi Juiz estajiadu nain ida, Ministeriu Publiku reprezenta husi Prokurador Rafael Gusmao, arguidu sira hetan asistensia legal husi Advogadu Privadu nain ida no Defensor Publiku nain ida.
Rekorda katak, antes nee Polisia Sientifiku Investigasaun Kriminal (PSIK) ho Servisu Nasional Intelijensia (SNI) kaptura arguidu nain 19, inklui prende ho objeitu krime sira.
Suspeitu sira nee maioria husi nasaun Xina, iha Indonezia nain ida no Malazia nain ida.
Ekipa refere mos halo aprensaun ba kareta rua, no fasiliade eletronika estarlink unidade hitu no telemovel.
(ter)
