LAUTEM, STLTIMORLESTE.com – Konselhu Imprensa fo formasaun Meiu Ambiente ba jornalista nain 14, kompostu husi feto 6 no mane 8, formasaun nee realiza durante loron tolu iha Munisipiu Lautem.
Jornalista sira neebe mak tuir formasaun jornalizmu meiu ambiente nian mai husi media eletroniku, media online no imprimi mak hanesan Media STL, RTTL, Timor Post, Hatutan.Com, Neon Metin, Media Mudansa, Lafaek News, inklui Radiu Komunidade Lospalos.
Diresaun Analize no Dezenvolvimentu Media, Alberico da Costa Junior hatete, objetivu prinsipal husi treinamentu nee atu garante kapasidade indepedensia jornalizmu iha kada redasaun media nian, nunee treinamentu ida nee atinji objetivu jeral neebe mak Konselhu Imprensa iha.
“Hau hatene kolega sira balun hetan ona materia kona-ba Meiu Ambiente nia, formasaun nee bele hasae ita nia konhesimentu hodi hametin liu tan ita boot sira nia kapasidade, saida mak ita boot sira hetan ona, ONU mos foti tema jeral kona-ba krize ambiental, media halo asaun ruma atu bele rezolve krize ambiental neebe mak daudaun nee mundu hasoru, krize ambiental ida nee iha realidade moris katak mudansa klimatika inundasaun neebe mak akontese,” dehan Alberico wainhira abertura ba formasaun treinamentu iha salaun Roberto Carlos iha Lautem, Kuarta (23/04/2025).
Iha fatin hanesan, Diretor Ezekutivu Antonio Dias afirma, atu estraga Meiu Ambiente nee lalais, maibe susar atu koopera direita atu moris iha ambiente, maibe iha mos dever atu konserva ambiente.
“Importansia husi Meiu Ambiente nian, ita hatene katak meiu ambiente ita atu estraga nee lalais, maibe atu re-koopera nee susar tebes, tanba nee presiza lideransa, tanba jerasaun ida agora nee tenke salva jerasaun tuir mai, ida nee mak ita hanaran jornalizmu ambiental,” dehan Diretor Ezekutivu Antonio.
Nia hatoo agradese ba media sira tanba bele partisipa ona iha treinamentu ida nee hodi koalia kona-ba Meiu Ambiente para kontribui ba jerasaun tuir mai, tanba jornalista sira mak sai ema neebe mak prova ambiente pro sustentbilidade ambiental.
“Agradese ba media sira bele mai iha nee atu ita hamutuk koalia kona-ba Meiu Ambiente hodi haree kona-ba futuru ambiente balun neebe mak kontribui ba jerasaun tuir mai, sei ita nia Meiu Ambiente nee estraga hotu ita labele koalia kona-ba politika, ekonomia no ita labele koalia kona-ba edukasaun, tanba laiha fatin neebe mak ita konhese, iha minutu balun nia laran hanoin fali Amu Papa Francisco neebe mak mate ona, tanba nia mos hadomi Meiu Ambiente liu husi nia knaar Pastoral Laudato si neebe koalia kona-ba ambiente,” tenik nia.
Entretantu jornalista Sandy Belo husi Media Mudansa hatoo agradese ba Konselhu Imprensa neebe mak realiza atividade treinamentu jornalizmu ambiental, liu husi treinamentu nee bele aumenta nia konhesimentu ba iha mundu jornalizmu nian.
“Treinamentu ida nee fasilita tebes ami jornalista sira atu halo kobertura neebe mak klean liu ba iha ambiente nian, hau mos husu ba Konselhu Imprensa atu treinamentu ida nee labele too deit iha ne’e, tenke kontinua ho treinamentu sira hanesan nee, atu nune’e ami jornalista sira mos iha konhesimentu neebe natoon ba iha area jornalizmu ambiental nian,” nia hakotu.
(EST 2)
