DILI, STLTIMORLESTE.com – Joven mak sai promotor ba pas, tanba nee nafatin hatudu unidade no dame iha festa tinan foun, nunee husik tinan 2024 no simu tinan 2025 ho dame.
Lia hirak nee hatoo husi Ministru Komersiu Indutria (MKI), Nino Pereira ba jornalista sira iha Palasiu Prezidensial, Nicolau Lobato, Bairo Pite, Dili Sesta (27/12/2024).
Nia dehan, Natal liu daudaun ona situasaun hotu lao hakmatek, tanba nee husu joven neebe sai promotor pas kontinua dame iha idak-idak nia fatin, nunee selebrasaun festa tinan foun bele lao ho hakmatek.
“Esperansa selebrasaun tinan foun bele lao hakmatek, tanba nee mak hanesan joven ita mak sai hanesan mensajeiru ba pas nia, ita mak transforma dame hahu husi ita nia aan mak sai ba ita nia familia no sai ba komunidade,” dehan MKI, Nino.
Tuir nia, haree ohin loron joven sira maduru ona, tanba nee iha sosiedade ka kada bairu situasaun lao hakmatek tebes.
“Hau fiar katak joven Timor Leste ohin loron maduru ona, joven neebe mak komuga prinspiu hakarak hatutan buat neebe mak diak, tanba nee mak ita presiza fo liman ba malu nuudar Timoroan, ita orgulhu ho nasaun ida nee, ita orgulhu ita nia lider hotu-hotu, ita hakarak rai ida nee hakmatek, ita mak tenke sai promotor ba pas, dame no hakmatek iha ita nia nasaun,” hatete governante nee.
(eme)
