Justisa Tenke Rigor Ba Ema Deskonhesidu Tiru Rezidensia Lú Olo

Visi Diretor Asosiasaun HAK, Antonino de Limas. (Foto STL/EST 1)

DILI, STLTIMORLESTE.com – Asosiasaun HAK husu ba autor juridikativu iha Setor Justisa, liu-liu Tribunal Rekursu (TR) tenki implementa lei ho rigorozu hodi investiga ema deskonhesidu neebe tiru eis Prezidente Republika (PR), Fransisco Guterres Lú Olo nia rezidensia.

“Ita haree akontesimentu ida nee perigu tebes iha Estadu Timor Leste, tanba bele estraga ema nia vida, nunee presiza masimiza liu tan lei seguransa ninia, liu-liu ema neebe sai auto defeza ba lider rezistensia sira, hanesan parte seguransa (eskoltu) sira iha area refere,” dehan Visi Diretor Asosiasaun HAK, Antonino de Limas ba jornalista sira iha Farol, Dili, Tersa (14/01/2025).

Tanba tuir nia, husi parte seguransa tenke halo investigasaun klean no profisional, nunee lori autor refere ba Ministeriu Publiku (MP) ka Tribunal Rekursu, nunee bele deside tuir lei neebe vigora, tanba aktu ida nee krimi, bele prezudika pesonalia ema nian.

Parte seguransa sira neebe sai auto defeza ba lider rezistensia sira no eis titular sira nian tenke servisu ho profisional, tanba rezidensia eis PR Lú Olo nian, ho derepente deit, balastik nee mosu iha laran, signifika lei tenke rigor hodi halo investigasaun masimu, nunee lori autor refere tuir lei haruka.

Iha parte seluk, Diretor husi Asosiation Justice And Rights (AJAR), José Luis Oliveira dehan, autoridade relevante sira, liu-liu iha setor justisa tenke halo investigasaun klaru, nunee bele klarifika diak fukun husi problema refere, katak ema neebe mak sai autor ba problema hodi tiru eis Prezidente Republika, Lú Olo nia rezidensia, atu klarifika ba publiku hodi hatene.

Tanba aktu ida nee hatudu sinal negativu (la diak) ba vida politika nian, no sistema demokrasia nian iha Timor Leste, tanba bele iha diverzensia idelojia no politika, maibe laos liu husi maneira ida nee atu halo violensia ba malu, nee hatudu sinal neebe la diak ba Estadu Timor Leste iha futuru.

(EST 1)

Share it :

Leave a Reply

Your email address will not be published. Required fields are marked *