DILI, STLTIMORLESTE.com – Kada professor iha Pre-Eskolar Moris Foun I hanorin estudantes nain 50, ne’ebé fahe ba turnu rua, dader no meudia.
Kordenadora Pre-Eskolar Moris Foun I, Domingas Beatriz da Cunha, hateten ba STL, iha nia knar-fatin, Tersa (25/08/2026), katak eskola ne’e iha professores na’in tolu, tuir regra ne’ebé determina professor ida responsavel ba estudantes 50.
“Iha ne’e ami nia professores na’in tolu. Tanba iha regra katak professor ida iha labarik 50. Dader iha estudantes 25 no meudia 25. Entaun kada professor ida kaer estudantes 50,” nia hateten.
Domingas mos hateten katak númeru professores ne’ebé iha agora sufisiente ona. Se iha professor ida moras ka husu lisensa, professor seluk sei substitui nia iha sala aula.
Nia hateten katak prosesu aprendizajen iha Pre-Eskolar Moris Foun I lao diak, ho professores na’in tolu ne’ebé hanorin estudantes sira.
“Ami nia ensinu pre-eskolar halao aprendizajen ho diak tebes. Ami nia professores na’in tolu mak hanorin estudantes sira iha pre-eskolar ida ne’e. Uluk ami uza edifísiu ida iha sorin, maibé agora ami uza ona ami nia edifísiu rasik hodi halao prosesu aprendizajen,” nia informa.
Iha fatin seluk, Kordenador EBF N.o 5 Comoro, Marcelino Moniz, hateten katak professor kada turma halao prosesu aprendizajen ba estudantes sira, maski iha professores balun ne’ebé tama ona idade reforma.
“Ita nia professores kada turma hanorin estudantes sira. Professores balun tama ona idade reforma, maibé durante ne’e professor sira kontinua halao ensinu no aprendizajen ba estudantes sira. Hau hanoin katak nudar professor, ita halao ita nia knar ho diak liu husi aprendizajen ne’ebé ita fó ba estudantes,” nia informa.
Enkuantu Kordenador EBF Fatumeta, José Manuel Guterres, hateten katak prosesu aprendizajen iha kada sala lao diak hanesan bai-bain. Nia dehan númeru estudantes iha kada sala determina distribuisaun estudantes ba professor ida-idak.
“Kada sala depende ba númeru estudantes ne’ebé iha ona. Tanba ne’e, kada professor ida hanorin estudantes sira iha kada sala ida-idak,” nia dehan.
(jac)
