DILI, STLTIMORLESTE.com – Ministeriu Eduksaun (ME) kada tinan halo eskola sira neebe mak lokaliza iha area remotas, dala ruma eskola iha area remotas nee iha tempu udan susar tebes atu kompanhia sira lori material konstrusaun ba too iha fatin.
“Ami tinan-tinan halo eskola sira iha area remotas, tanba dala ruma iha area remotas nee iha tempu udan susar tebes atu kompanhia sira lori material konstrusaun ba too iha neeba, ida problema natureza nee rasik mak susar ba sira atu lori ba, ME iha engeneiru sira iha terenu, normalmente engeneiru sira iha informasaun kona-ba situasaun sira hanesan nee,” ME Dulce ba jornalista iha sala VIP Ministeriu Edukasaun Vila-Verde, Kuarta nee (06/05/2026).
Tuir Ministra Dulce katak, sira nafatin halo kontrolu, tanba saida mak situasaun sira nee akontese no bele justifika, depois haree tuir regras infraestrutura nian, nomos regras legais neebe mak tenke aplika ba kompanhia sira, ezemplu sira la prienxe regras neebe mak hatur tiha ona, bainhira asina kontratu ho ME.
Iha parte seluk, Diretor Servisu Edukasaun Munisipiu Ainaro, Patricio da Costa Magno hatete, kona-ba ekipamentus pratika nian iha ensinu tekniku vokasional nee kompletu hela para estudantes sira bele halo pratika, depois de simu teoria husi profesores, sira bele halo pratika, liga ba infransturtura eskola nian nee tekniku sira sukat ona, dadus iha hotu ona, hein planu orsamentu husi ME.
“Difikuldades neebe mak ita nian eskola sira iha Ainaro infrenta nee mak problema infraestrutura eskola no rekursu, enfraesturtura mos eskola balun deit, laos eskola hotu-hotu, tanba eskola balun mak seidauk diak, sala de aula ba ita nian estudantes sira seidauk sufisiente, inklui kondisaun eskola neebe presiza atu hadia, nee manorin edukasaun pre eskolar no sekundariu ida,” dehan Patricio.
Entretantu Diretor Servisu Edukasaun Munisipiu Bobonaro, Miguel Freitas hatete, tinan ida nee SEM Bobonaro nafatin identifika kondisaun infraestrutura eskola, maibe tanba daudaun nee udan hela, depois mak ami sei halo kontinuasaun, ita nian eskola 13 nee pre eskolar hotu.
“Iha tinan kotuk ami identifika ona ita nian ensinu pre eskolar hamutuk 13, husi numeru nee ualu halo konstruksaun foun no lima reabilitasaun, agora ba tinan ida nee ami nafatin identifika ita nian infraestrutura eskola, atu nunee ita bele hatene lo-loos katak hira mak tama ba konstrusaun foun no hira ba reabilitasaun ninia,” nia deklara.
(jac)
