DILI, STLTIMORLESTE.com – Komisaun Anti Korupsaun (KAK) bolu Prezidente Autoridade Munisipiu Aileu hodi halo identifikasaun, ligadu ho informasaun no keixa neebe simu kona-ba ezekusaun orsamentu.
“KAK hanesan orgaun Polisia Kriminal Espesializada neebe mak iha poder polisial, entaun uza poder polisial nee bazeia ba informasaun neebe KAK rekolha, no keixa neebe tama liga ho ezekusaun orsamentu iha Munisipiu Aileu nian,” dehan Diretor Investigasaun Kriminal KAK, Jose Verdial ba jornalista sira iha Farol, Tersa (10/06/2025).
Nia hatutan, bazeia ba ida nee mak KAK hanesan orgaun Polisia Kriminal espesializada uza poder polisial neebe lei fo iha artigu 53 halo identifikasaun, tanba nee KAK nia ekipa investigasaun ida ba iha Aileu bolu PAM hodi mai halo identifikasaun.
Esplika tan, iha lei prosesu penal artigu 53 nee hateten katak, banhira iha indisus ruma no informasaun ruma kona-ba ema ruma envolve iha prosesu ruma indisus krimi, foin atu halo ka prepara aan atu halo, entaun orgaun polisial sira iha kompetensia atu halo identifikasaun, no bazeia ba ida nee mak KAK halo identifikasaun.
Reforsa, tuir informasaun neebe simu katak, iha ezekusaun orsamentu la lao tuir nia regra neebe iha, hodi fo fali benefisiu ba parte balu. Ho informasaun sira nee mak inisiativa investigador sira halo identifikasaun hodi hatene lo-loos informasaun sira nee, no ida nee akontese kona-ba ezekusaun orsamentu iha tinan 2024 too iha 2025, no KAK foin halo deit identifikasaun ba PAM Aileu.
Hatan kona-ba iha indisus ruma karik nia prosesu lao oinsa, Jose esplika iha lei prosesual penal artigu 53 hatete iha rezultadu identifikasaun iha ka la iha indisus neebe natoon atu detein ka la detein, maibe automatikamente autus neebe investigador halo tenke hakerek iha autus no haruka ba iha Ministeriu Publiku.
Afirma tan, ita nia lei hateten klaru, depois de identifikasaun komprova duni informasaun sira neebe KAK simu no rekolha, no keixa neebe KAK simu, tenke prepara kedan autus haruka ba iha Ministeriu Publiku.
Reforsa, halo identifikasaun nee bazeia ba informasaun neebe KAK rekolha, bazeia ba informasaun neebe espala iha media sosial sira, inklui mos keixa husi komunidade sira no parte relevante balu neebe iha konhesimentu kona-ba prosesu nee.
Mezmu nunee, tuir lei atu halo identifikasaun 12 de tempu, no termina atu iha provas ka la iha provas, tenke fo kedan liberdade ba ema nee.
Informa tan, atu bolu ema ida atividade sira hanesan nee hetan koordenasaun ho Departamentu Investigasaun Kriminal Polisia Nasional Timor Leste.
Tuir informasaun neebe iha katak, iha loron Tersa ekipa Informasaun Sekreta Komisaun Anti Korupsaun ho Servisu Investigasaun Kriminal liu husi aksaun polisial nian ba bolu obrigatoriu Prezidente Autoridade Munisipiu (PAM) Aileu ho inisial JBdS iha edifisiu Administrasaun Munisipal Aisirimou Aileu, no lori mai iha Edifisiu CAC Farol Dili durante horas balun tuir identifikasaun.
Investigador Senior Antonio Guterres lidera ekipa CAC ba halo aksaun Polisial iha tuku 9:30 OTL dadersan ba PAM Aileu JBdS iha edifisiu PAM Aisirimou Aileu.
PAM JBdS rasik hamutuk, kargu Xefias no funsionariu publiku sira neebe haknaar aan iha Administrasaun Munisipiu Aileu nian kolabora diak ho ekpia KAK iha aksaun polisial nee.
Ekipa KAK lori PAM Aileu JBdS hodi tuir identifikasaun kona-ba informasaun preliminariu balun husi publiku, neebe tama iha Unidade Informasaun Seguransa KAK nian, no KAK halibur informasaun inisial bazeia ba Lei Nu.8/2009 25 de Julhu Estabelesimentu KAK.
Operasaun loron ohin nian nuudar kontinuasaun aksaun polisial neebe ekipa KAK halao aksaun polisial hanesan ba Xefe Gabinete PAM Aileu nian halao iha loron 12 fulan Maiu. Hafoin halo identifikasaun, investigador KAK nian fo ona liberdade ba nia hodi tuir prosesu sira normal no kontinua asegura aplika prezunsaun inosensia ba nia tuir lei determina ona.
(ter)
