DILI, STLTIMORLESTE.com – Komisariu Komisaun Anti Korrupsaun (KAK), Rui Perreira informa katak, daudaun nee KAK iha hela dezentendimentu ho Ministeriu Publiku (MP).
“Hau atu esklarese iha nee katak, Komisariu KAK nee Membru Parlamentu Nasional (PN) mak hili, tanba nee hau laos mai atu hatoo keixa iha nee, maibe atu informa ba Uma Fukun Povu nian katak, KAK iha dezentendimentu ho Ministeriu Publiku (MP), tanba avoka kazu 23 husi KAK, sem razoens tuir lei hatete, tanba poder investigasaun kriminal ba kazu korupsaun iha KAK,” dehan nia.
Nia haktuir tan katak, despaixu husi Prokurador Jeral da Republika (PGR) numeru 16/PGR/2026 iha pontus rua, pontus neebe delega ba KAK, prokurador titular tenke avoga tiha hotu, ida nee primeiru, segundu orienta ba iha koordenadora GCCO no Procurador da Republika ka Tribunal Distrital sira, hanesan Baukau, Suai, Dili no Oecusse, atu avoga hotu prosesu sira nee.
Ami kumpri, halo relatoriu tuir sira nia pedidu no prosesu sira nee ita haruka ona ba iha ministeriu Publiku iha fulan fevereiru 2026. Dezentendimentu nee nia hun nee mai husi, statementu PGR nian iha media, ligadu ho buska no aprensaun neebe maka KAK halo ba iha ita nia entidade pesoal balun no buska no aprensaun neebe maka KAK realiza, ida nee bazeia ba pedidu no autorizasaun despaixu tribunal ninian, KAK la tur-tur atu halo buska no apresaun, sem kumpri ba regras sira neebe maka iha,” dehan nia iha plenaria Parlamentu Nasional ho membru Parlamentu Nasional (PN), Segunda (13/04/2026).
Nia haktuir tan katak, Adjuntu KAK nain rua mos fo klarifikasaun tanba PGR dehan sei investiga KAK, sei investiga PCIC no sei investiga Polisia Nasional Timor Leste (PNTL), kalo sira halo violasaun ba segredu justisa.
“KAK durante nee kumpri hela, delegasaun sira neebe maka mai mos KAK kumpri hela ba orientasaun husi prokurador tutelar sira no prazu neebe maka delega mai mos dentu de prazu KAK la viola no KAK kumpri husi kazu 23 neebe maka iha, molok avoka, iha kazu 6 maka ita finaliza relatoriu final no restu ita submete ona tanba Ministeriu Publiku ezije katak, prosesu sira nee ba hotu sira, tanba nee prokurador nain 4 neebe maka kaer hela prosesu nee, andamentu too iha neebe ona, ita la hatene, sei kazu balu ho durasaun nee ba tinan 6 deit ba falsifikasaun nee mos prezudika nomos bele preskreve, KAK lakohi atu ita nia politika nain sira hateten katak, budu kazu sira iha neeba, maibe lae, ami husi KAK kumpri sasan hotu-hotu, Komisariu KAK mai iha nee laos keixa maibe husu ba Prezidente Parlamentu Nasional Ezersisiu ka Visi Prezidente Parlamentu Nasional bele informa ba Prezidente da Republika, Jose Ramos Horta, tanba PGR labele halo serbisu mesak, orgaun jurisiariu tolu nee serbisu hamutuk hodi lori ba tribunal,” dehan nia.
Iha biban nee, Deputadu Bankada Partidu Frente de Revolusionariu Timor Leste Independente (FRETILIN), Maria Angelina Rangel da Cruz dehan, ohin Komisariu KAK ohin la mai halo keixa, maibe Komisariu KAK la iha relasaun diak ho PGR.
“Ohin ita boot deklara iha Parlamentu Nasional katak, ita boot mai iha nee la halo keixa maibe la iha relasaun diak ho PGR, hau hatene katak iha kazu 10 maka oras nee ita iha dezentendimentu ho PGR, tanba kazu 10 maka PGR dada fali.
Relasiona ho KAK la iha nehan, Prezidente Ezersisiu Parlamentu Nasional, Duarte Nunes dehan, ohin Komisariu KAK mai aprezenta sira nia relatoriu atu nunee deputadu sira halo apresiasaun no avaliasaun ba serbisu hirak neebe maka durante nee sira halo, nunee fo hanoin ba Komisariu KAK atu hadia sira nia serbisu ba oin.
“Hau hanoin, KAK iha nehan ka la iha nehan, ida nee lei maka fo, atu sira halo investigasaun deit depois fo informasaun ba iha Ministeriu Publiku atu kontinua prosesu nee, ida nee lei maka haruka. Tanba nee, KAK importante, presiza ajuda serbisu Ministeriu Publiku bele lao,” dehan nia.
Agenda No.222/VI/(3a) reuniaun Plenaria Parlamentu Nasional, Komisaun Anti Korrupsaun (KAK) halo relatoriu ba atividades tinan 2025 neebe prezide husi Prezidente Parlamentu Nasional ezersisiu, atual Visi Prezidente Parlamentu Nasional Deputadu Duarte Nunes.
(jos)
