DILI, STLTIMORLESTE.com – Komisaun Anti Korupsaun (KAK) selebra aniversariu ba dala 15, ho lansamentu planu estratejiku tinan 2026 too 2030.
Tuir Komisariu KAK, Rui Pereira dos Santos katak, selebrasaun aniversariu KAK nian ba dala 15, neebé harii iha 22 Fevereru 2010. Haree ba idade 15, KAK seidauk halo buat barak, maibe poder neebe mak atribui ba sira iha area prevensaun no investigasaun kriminal, haree fila fali ba kotuk iha susesu lubuk ida mak halo ona.
“Iha area investigasaun kriminal nian, iha kazu lubuk ida mak ba too Tribunal, balu konsege ba too prizaun. Iha kazu balu mak too ohin loron nia prosesu lao hela,” dehan Komisariu KAK ba jornalista sira iha edefisiu KAK, Farol, Sesta (21/02/2025).
Nia hatete, KAK la destingi kona-ba kazu boot mak prioridade ba kazu kiik, maibe KAK komplimentu ba kodigu prosesu penal kona-ba prazu, atu halao servisu kumpri ba lei neebe iha.
Nia sublina, kazu boot sira neebe uluk iha nia prosesu lao hela unklui ZEESM nian, aviaun ZEESM, agrikultura, no uma rezidensia Fulolo, sira nee investigasaun lao hela. No kazu balu konkluzaun relatoriu final investigasaun haruka ona ba iha Ministeriu Publiku hamutuk lima.
Iha fatin hanesan, Ministru Justisa, Sergio da Costa Hornai dehan, dezafiu estrutura KAK atu goza sira nia autonomia ho independensia iha Republika Demokratika Timor Leste ida nee.
“Komisariu, Adjuntu no estrutura tomak, ita boot sira la mesak, ita boot sira goza ita boot sira nia autonomia, ita boot sira nia independensia mai ita iha uma mahon republika ida nee. Ita boot sira sei halo servisu ida konsolidadu liu iha materia investigasaun kriminal ninian, nuudar orgaun koazuvador ba autoridade judisiariu sira liu-liu iha Prokurador Jeral iha materia investigasaun kriminal, ita boot sira sei hametin liu tan koezaun ida nee,” hatete nia.
Tuir nia katak, KAK nia papel atu halo investigasaun atu metiga aktu sira neebe estadu atribui, KAK hanesan orgaun polisia espesial atu bele haree, nomos ba medida prevensaun iha materia investigasaun kriminal ba irregularidade ilisitude sira neebe karik mosu daudaun iha sosiedade nee.
Aleinde nee Prokurador Jeral Republika, Alfonso Lopez dehan, kria Instituisaun KAK atu reforsa servisu neebe iha, no hatoo parabens ba iha aniversariu KAK.
“Kria Instituisaun KAK atu reforsa parte balu tenke nakloke atu hadia, iha reforma justisa parte balu lao hela, balu diak ita rekonhese no balu la diak ita rekonhese, hatoo parabens ba aniversariu KAK,” dehan nia.
Nia hatutan, hahu husi lideransa primeiru too mai agora, ba oin KAK sei servisu diak liu.
(ter)
