DILI, STLTIMORLESTE.com – Visi Primeiru Ministru no Ministru Koordenador ba Assuntu Ekonomiku, Ministru Turizmu no Ambiente, Francisco Kalbuadi Lay ezije ba estrutura foun neebe foin simu pose atu kaer metin valor sira setor banku nia laran, no tenke kria ambiente ukun ida neebe transparensia, hodi nunee sidadaun hotu-hotu bele sente konfiansa iha banku nee nia sistema finanseiru.
Ministru Koordenador ba Assuntu Ekonomiku reprezenta Governu nuudar asionista uniku iha Banku Nasional Komersiu Timor Leste (BNCTL – sigla português) nee konsidera serimonia tomada pose ba Konselhu Administrasaun (CEO) no Konselhu Ezekutivu (Prezidente) BNCTL nian marka kapitulu importante ida iha nasaun nia viajen ba dezenvolvimentu ekonomiku sustentavel.
Ministru Koordenador ba Assuntu Ekonomiku hamutuk ho Governador Banku Sentral Timor Leste, Helder Lopes inklui membru governu sira seluk sai sasin ba serimonia tomada pose ba Prezidente Konselhu Administrasaun, Januario da Gama no Prezidente Komisaun Ezekutiva, Marcelo da C. Carvalho iha BNCTL ho mandatu tinan 2 (2025-2027).
Visi Primeiru Ministru no Ministru Koordenadór ba Assuntu Ekonomiku, Ministru Turizmu no Ambiente, Francisco Kalbuadi Lay komprometidu atu kontinua fo apoiu ba instituisaun sira neebe sai ajente importante ba ekonomia Timor Leste nian, tanba povu mak sai sentru ba dezenvolvimentu.
Visi PM nee husu estrutura BNCTL nia atu servisu ho transparensia, responsabilidade atu manan konfiansa husi povu iha sistema finanseira hodi kontribui ba dezenvolvimentu ema hotu nian ba moris diak.
“Ita nia Governu (MCAE) iha ninia polítika ida klaru katak, ita iha kompromisu atu apoia prinsipiu governasaun diak, transparensia no responsabilidade iha programa no atividade hotu-hotu iha setor hotu-hotu. Prinsipiu hirak nee laos deit ideas, maibe sai nuudar fatuk hun ba MCAE nia estratejia atu asegura katak dezenvolvimentu ekonomiku nasaun nian tradus ba prosperidade real ba ita nia povu,” hatete Francisco Kalbuadi Lay liu husi nota komunikadu neebe STL asesu husi media Gabinete Visi Primeiru Ministru, Sesta (21/03/2025).
Visi PM nee mos bolu atensaun ba servidor Estadu hotu liu-liu lideransa foun sira iha BNCTL tenke tau povu mak sai nuudar sentru ba dezenvolvimentu.
“Bainhira ita hahu kapitulu foun ida nee ho lideransa Banku Nasional Komersiu nian, mai ita hanoin hetan katak ita nia povu mak tenke sai nuudar sentru ba dezenvolvimentu nian. Sira nia nesesidade no aspirasaun tenke orienta ita nia asaun no desizaun sira. Banku Komersial iha papel importante atu fasilita asesu ba servisu finanseiru, fasilita emprezariedade no promove kresimentu inkluzivu,” hatete governante nee.
(alb)
