DILI, STLTIMORLESTE.com – Visi Primeiru Ministru no Ministru Koordenador Assuntu Ekonomia, no Ministru Turizmu no Ambiente, Francisco Kalbuadi Lay promete sei apoiu ekipamentu muzika nomos ekipamentu desportu ba dadur sira, iha prizaun Bekora.
“Apoiu fo material muzika, ekipamentu desportu hamutuk ho Ministru Justisa, no mos Prezidensia Republika, se mak atu mai entrega depois Asesor Prinsipal Prezidensia Republika nian Quintiliano mak sei mai entrega ba Diretor Prizaun Agapito Canto,” dehan Kalbuadi ba jornalista sira, bainhira remata fahe prendas Natal nian ba dadur sira, iha prizaun Bekora, Dili, Kinta nee (19/12/2024).
Nia dehan, ekipamentu sira nee sei entrega iha fulan Janeiru tinan 2025, bainhira remata selebra festa Natal no tinan foun.
Nunee mos Asesor Prinsipal Prezidensia Republika, Quintiliano Moniz hatete, ida nee visi Primeiru Ministru promete ona atu entrega ekipamentu muzika, nomos desportu nia maibe laos ba prizaun Bekora deit, maibe ba mos prizaun Gleno tanba sira mos husu.
“Ekipamentu desportu nee Visi Primeiru Ministru promete ona, ita sei fo ekipamentu desportu, ekipamentu muzika ba sira, laos ida nee deit, Gleno mos, tanba Gleno sira mos husu, sei halo koordenasaun,” dehan asesor nee.
Nia dehan, Prezidensia Republika sei koordena ho Gabinete Visi Primeiru Ministru atu bele haree tinan oin mai bele ba entrega.
(eme)
