DILI, STLTIMORLESTE.com – Relasiona ho kandidatu husi Majistradu, Ministeriu Publiku, Juiz no Defensor Publiku neebe halao hela formasaun iha Portugal, banhira sira fila husi Portugal mai iha Timor kuandu sira liu ona mak sira sei submete ba iha faze estajiu.
“Sira sei fila husi Portugal mai iha Timor, no sira fila mai sei sujeita ba iha formasaun ida neebe ita bolu formasaun faze estajiu nian,” dehan Ministru Justisa, Sergio Hornai ba jornalista sira iha Kaikoli, Tersa (10/06/2025).
Nia hatutan, iha tempu badak sei iha reuniaun Konselhu Jeral Setor Justisa nian atu haree, hamutuk ho Sentru Formasaun Juridiku no Judisiariu, atu sira neebe admitidu sei ba iha Instituisaun idak-idak halao estajiu.
Sublina tan, durante periodu estajiu nian halo mos formasaun komplementar ruma, atu prienxe antes faze estajiu nian konklui, sira sei halo integrasaun nuudar efetivu iha kada instituisaun iha Juiz, Prokurador no Defensor.
Iha fatin ketak, Prezidente Asosiasaun Majistradu, Antonino Gonsalves dehan, ho prezensa majistradu nain hira nee nian bele apoiu servisu iha Tribunal.
“Sira nain hira nee fila mai se sira pasa ona sira bele halao fali estajiu atu apoiu servisu sira iha Tribunal,” dehan nia.
Afirma tan, ohin loron rekursu umanus iha setor justisa sei menus, tanba nee ho formadus sira nee bele reforsa liu tan sevisu iha setor justisa.
Tuir observasaun STL nian, kandidatu Majistradu sira neebe ba tuir hela formasaun iha Portugal, husi Juiz nian hamutuk 13, Defensor nain 4 no Prokurador nain 7.
(ter)
