DILI, STLTIMORLESTE.com — Kandidatu sira ne’ebé admitidu ba vaga rekrutamentu Juiz Supremu Tribunál Justisa (STJ) no Tribunál Rekursu (TR) sei tuir teste iha fulan Setembru ne’e.
Prezidente Tribunál Rekursu, Afonso Carmona hateten katak, kandidatu sira ne’ebé admitidu ba vaga Juiz Supremu Tribunál Justisa sei tuir teste iha loron 18 to’o 21 Setembru 2026.
“Agora ita nia juízes sei halo teste iha loron 18 to’o 21 Setembru, atu ita bele halo avaliasaun ba sira no haree sé mak pasa atu ba tuur iha Supremu Tribunál,” dehan Afonso Carmona ba jornalista sira iha Kaikoli, Tersa nee (09/09/2026).
Nia hatutan katak, teste ba kandidatu sira ne’ebé atu tuur iha STJ no TR sei halao ho rigor no transparénsia, ho matéria hotu-hotu uza lian Portugés.
“Sira uza lian Portugés. Bainhira juri sira fó teste, rezultadu sei entrega ba Komisaun Rekrutamentu. Komisaun ne’e sei fó ba Konsellu Superiór Majistratura Judisiáriu, no iha ne’ebá mak konsellu sei determina sé mak pasa ba Supremu Tribunál no Tribunál Rekursu,” nia esplika.
Afonso Carmona prevee katak, prosesu ne’e bele remata iha Novembru, no karik Prezidente Repúblika halo tomada pose ba juízes foun sira, sira bele hahú servisu iha tempu ne’e. Maibé, se prosesu ne’e la konsege remata, posibilidade mak nomeasaun no tomada pose bele akontese iha final tinan 2026.
Prezidente Tribunál Rekursu mós hateten katak Komisaun Rekrutamentu Juiz Supremu Tribunál haruka ona karta ba Prezidente Tribunál Rekursu atu autoriza fatin ba juri sira ne’ebé sei fó teste ba kandidatu STJ no TR.
Nia hatutan katak, komisaun husu mós atu prepara ona fatin ba juízes na’in hitu ne’ebé sei tuur iha Supremu Tribunál Justisa. Kuandu prosesu teste remata no determina ona sé mak sei sai juiz Supremu Tribunál, juízes na’in hitu ne’e bele simu pose no hahú servisu.
“Ohin sira haruka haree fatin iha terenu atu halo gabinete ba Juiz Supremu na’in hitu no fatin ba juri sira ne’ebé iha tempu badak sei to’o mai,” nia hateten.
Afonso Carmona dehan katak preparasaun ba estabelesimentu Supremu Tribunál Justisa lao di’ak, tanba ne’e sai parte ida husi programa Governu, inklui apoiu orsamentu, atu instituisaun ne’e bele funsiona.
“Ha’u nia esperansa mak Supremu Tribunál tenke hamriik duni ba interese povu nian. Ha’u laiha interese pesoál. Ha’u nia interese mak Supremu Tribunál tenke hamriik ba povu, liuliu atu fó justisa ba povu ho justu,” nia subliña.
Nia mós hateten katak iha área justisa, buat tolu mak sai xave ba Timor-Leste, mak seguransa jurídika, justisa no utilidade.
“Tribunál tenke hamriik ba povu, liuliu atu fó justisa ba povu,” nia afirma.
Iha sorin seluk, akademiku Universidade Nasionál Timor-Leste (UNTL), Rafael de Jesus, dehan teste tenke halao ho rigor, atu kandidatu ne’ebé iha kapasidade di’ak bele pasa.
“Ha’u hanoin teste tenke halo ho rigor. Sé mak iha kapasidade di’ak, bele pasa, atu servisu justisa ne’e bele lao ba oin,” dehan nia.
Nia hatutan katak iha tempu ohin loron Timor-oan barak buka justisa. Tanba ne’e, ema sira ne’ebé sei tuur iha STJ no TR tenke iha kapasidade no kompeténsia di’ak atu bele lori sistema justisa Timor-Leste ba oin.
(ter)
