DILI, STLTIMORLESTE.com – Jurista Timor oan konsidera katak, instala Supremu Tribunal Justisa (STJ), rekursu umanus neebe sei ba halao knar iha fatin neeba iha kapasidade neebe diak, tanba nee sei la iha duvidas.
“Ita nia Majistradu Judisial em termos kapasidade intelektual no etika deontolozia hau laiha duvida, sira nia kapasidade preparadu ona atu tur iha STJ, sira balu iha tinan naruk halo profisaun nuudar Juiz, sira merese tur iha STJ,” dehan Jurista Sergio Dias Quintas ba STL iha Kaikoli, Kuarta (13/05/2026).
Nia hatutan, STJ sei tesi lia kona-ba materia sivil, materia penal no mos materia eleitoral.
Esplika tan, konaba Juiz internasional, nia hanoin Juiz internasional mai ajuda deit em termos halo funsaun hanesan asesor ka halo servisu inspetoria, maibe sira laos mai halo funsaun hanesan Juiz iha STJ, ida nee la nesesariu, tanba ita iha Juiz neebe kualifikadu.
Afirma tan, konaba kapasidade intelektual la duvida, maibe liu husi prosesu rekrutamentu mak foin ita bele hatene se mak merese tur iha STJ, tanba iha ona komisaun ba rekrutamentu, para haree se mak priense kriteriu.
Iha fatin ketak, Akademiku UNTL, Sebastiao dos Santos dehan, tempu ona iha STJ, atu desizaun neebe Tribunal Rekursu foti la konkorda, bele rekore tan ba iha STJ.
“Hau hanoin tempu ona hari STJ, atu desizaun TR la konkorda bele rekore ba iha STJ,” dehan nia.
Afirma tan, ohin loron sei iha deit TR, tanba nee ba oin se iha ona STJ bele dehan sektor justisa bele lao ba oin. Nia parte mos husu, atu tur iha STJ tenke Juiz Timor oan, tanba ohin loron hatudu katak Juiz Timor oan iha ona kapasidade.
(ter)
